Shillong, Naiwieng 28 : Ka Sorkar Meghalaya kala pynkhreh ban pynlut haduh 50 million dollar ban tei ia 273 bad kyntiew kyrdan ia palat 2200 tylli ki Anganwadi Centre hapoh ka Jylla.
Ia kane la pyntip hadien ka jingialang bishar kam ba arsngi kynthih bala pyniaid da u Myntri ka Tnad Social Welfare ka Jylla Bah Paul Lyngdoh hynne ka sngi Ba-ar.
Kane ka jingialang bishar kam ka long halor ka jingpyntreikam ia ki skhim bapher bapher ka Sorkar Pdeng, kaba la long hadien san snem. Ka jingiakren kala iaid ruh halor ka jingdonkam ban thung ia ki stad ki jhad hapoh ka Tnad.
Haba iakren bad ki nongthoh khubor, u Bah Paul ula ong ba kawei na ki jingduna ba khraw eh hapoh ka Tnad ka dei ka jingbym don ia ki briew kiba tbit ban pynkhreh ia ki Detailed Project Report (DPR) bad ruh ban pynkhreh ia ki Utilization Certificate ha ka por kaba biang.
“Namar kata, ngi sngew donkam ban thung ia ki briew kiba tbit kiba lah ban iakren kam bad ki Ministry ha Delhi khnang ban lah iohkloi ia ki skhim bapher bapher, kiba la sakut namar ka jingbym lah ban pyndep ia ki jingdonkam ha ka por kaba dei” ula ong.
U Principal Secretary ka Social Welfare Sampath Kumar ula iathuh ba ka Tnad ka hap ai khubor sha ki san tylli ki Ministry ka Sorkar India ba kynthup ia ka Ministry of Women and Child Development, Ministry of Social Justice, Ministry of Tribal Affairs, Ministry of Minority Affairs bad ki khep ki khep sha ka DoNER.
“Ngi don ia ka Directorate kaba rit. Ta ka daw, ka jingpynkhlain ia ka Directorate kan sa urlong noh. Ka Directorate kan sa ioh noh ia ki jingkyrshan jong ki briew bat bit khnang ba kin lah bha ban iakren kam bad ki Ministry” ula ong.
U Kumar u pyntip ba ka Sorkar kala rai ban shna bad kyntiew kyrdan ia ki Anganwadi Centre-kiba mynta ki kdup ia palat 6 lak ngut ki khynnah.
“Ngi la buh ia ka mang tyngka ba 50 million dollar ban kyntiew kyrdan bad tei ia kine ki Anganwadi Centre” ula ong haba bynrap “Kumba nga ong, ngi la dep iasoi iaka soskular shim ram haba buh hakhmat ia kine ki kam bad kane ka long lyngba ka ADB Project nalor ki song pisa ba ngi ioh lyngba ka MGNREGS”.
U iathuh ba ka Tnad ryngkat ka jingiatreilang bad ka Tnad C&RD kala pynlong ia ka jingjurip ia baroh ki Anganwadi Centre hapoh ka Jylla bad haba pynshong nongrim ia kane, la lap ba 273 tylli ki Centre ki dei ia kaban pynpra noh bad ban tei thymmai. Palat 2290 tylli ki centre ba donkam ba kyntiew kyrdan.
U pyntup ba la bthah ruh ia ki Deputy Commissioner ba kin wanrah ia ki jingtyrwa ha kaban tei ia ki Aganwadi Centre ba thymmai ha palat 1500 tylli ki Shnong ki bym pat shah kynthup lang.
