Shillong Jymmang 02: Ka Sorkar jylla kala pynkhreh ban plie noh ha u bnai ban wan ia ka State of Art Musuem kaba don ha State Central Library Auditorium Complex, Shillong.
Ia kane la pyntip da u Myntri ka tnad Arts & Culture u Bah Paul Lyngdoh hadien ba ula dep lum ia ka jingialang, da kaba ong “Nga ong ia ka da ka State of the Art namar ba ngi la pyndonkam da ki teknoloji kiba thymmai bad ka jingleit rung ha kane ka Museum kan iarap ia ki nongwankai bad ia ki briew ka Meghalaya ban tip shaphang ki jingitynnad, histori, ka kolshor bad ki kam khaii bapher, ka jingim ki paidbah ha ki nongkyndong baroh kine yn pyninam lut ha ka museum, kaban sdang treikam noh naduh u bnai Jylliew mynta u snem.”
Ula ong ba shisien ba la sdang kane ka projek, ia ka Library Auditorium yn sa pynkynriah noh sha ka jaka kaba don ha Rilbong.
“Hadien ba ia ka iingdorbar thawain ka jylla la dep ban pynkynriah noh kumba la khmih lynti ha u Nailur-Risaw mynta u snem, ngin sa pynkynriah noh ia ka Auditorium sha Brookeside, kaba dei kaba hap hapoh ka jingkhmih jong ka Tnad Arts & Culture.”
U Myntri Sorkar ula pyntip shuh shuh ba ki kam ki jam ban tei ia ka Tagore Museum lah dep ban aiti sha ka MTDC ha ka jinglut jingsep kaban kot sha ka T.14 Klur.
U Bah Paul Lyngdoh ula pynbna ba ka jingshim rai ka sorkar ban tei shuh shuh ia ki Cinema Hall ha kylleng ka jylla kan sdang da kaba shna shwa ia ki Hall jong ka Tnad Arts & Culture ha Jowai bad Tura hapoh une u snem mang tyngka bad yn sa leh ruh ha kiwei pat ki District.
“Ban ialeh ban pynbiang ia ka jingdonkam ki paidbah khamtam na ka bynta ka jingpynmih phlim ha ka jylla, ngin sa iasoi ia ka jingiatehkular ha kaba yn sdang tei ia ar tylli ki Cinema Hall ha ka nongbah Shillong bad kane ka kam kan sa sdang noh shen bad kawei kadei kaba la dep ban pynkhreh, ia kaba la khot ka Black Box kaba don ha Lariti complex, New Shillong bad kawei pat kan don ha ka Library Auditorium,” ula ong.
Halor ka jingkylli, u Bah Paul ula ong “Nga kwah ban sam sha phi ia kane ka khubor ba kadei tang ka jylla Meghalaya kaba don ia ka OTT platform kaba la kyrshan da ka sorkar jylla. Kane ka OTT platform kala long kaba pawnam bha bad mynta wat ki briew na kiwei pat ki ri ruh kila peit ia kane ka rynsan. Baroh ki phlim kiba la shna ha ka ktien Khasi, Pnar bad Garo la pyni ha katei ka rynsan. Ki jingrwai bad ki Music Video ruh la pyni bad kumta kala long ka sienjam kaba khraw kaba la shim da ka sorkar jylla ban kyrshan ia ki tyngshop ki puron, ki kaitor bad ia ki kynhun tem”
Ula pyntip ruh ba ka sorkar ka dang pyrkhat ban ai noh ia ka khusnam State Films Award bad shisien ba la dep ban pynkhreh ia ki kot ki sla yn sa rah ha ka jingialang jong ka Kynhun Myntri.
Nalor kane, ula ong ba ka sorkar kala iaid shakhmat ban shim bad ban pyndonkam biang ia ka jaka kaba la longtrai da ka Tnad Arts & Culture ha ka Tribal Research Institute, Mawlai bad ki don ia ka jingthmu ban pynkynriah noh ia ka ktem jong ki CRPF sha New Shillong.
“Ngi khmih lynti ba kane kan urlong noh hashwa ban kut noh une u snem” ula ong.
Ka sorkar kala mang ruh T.2 Klur ban kyntiew bad shna pynbha ia ka State Central Library.
“Bna ialeh ban pynrung ia ka jingmlien ban pule ia ki kot, Ngi lah iatreilang bad ka seng hapoh jong ka ‘Kali Kit Kot’, kaban dei ka kali kaban iaid ha kylleng ki jaka kaba don ia ka Library hapoh ka jongka” ula ong.
