Shillong, Nailur 14: U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi Balang, ula pyntip ba ka Tnad kala pynkhreh mynta ia ka Detailed Project Report (DPR) na ka bynta ban pynheh noh ia ka surok Mawphlang-Mawsynram.
“Ngi la rai ban pynheh ban pynkylla noh ia kane ka surok sha ka Intermediate road. Shisien bala dep pynkhreh ia ka DPR, ngin sa buh ia ka mang tyngka” ong u Bah Prestone ha Iingdorbar haba jubab ia ka jingkylli bynrap jong u MLA ka Mawphlang Bah Eugeneson Lyngdoh.
Haba pynpaw ba kane ka surok ka long kaba donkam bha ia ka West bad South West Khasi Hills District, u Bah Prestone ula pyntip ba ka jingpynheh ia ka surok kan sdang na Ladmawreng shaduh ka Weiloi (kumba 25-26 Km) haba bynrap ba shisien bala buh ia ka mang tyngka, ka Tnad kan sa khot tender noh ban sdang trei ia ka kam.
U Symbud Myntri Rangbah ula kular ruh ban khmih ia ka jingdawa jong u MLA ka Mawsynram Bah Himalaya Shangpliang ban pynheh lang noh ia ka surok na Weiloi shaduh sha Dangar lane Balat.
Ka surok na Mawphlang sha Balat ka dei kaba la rim tam naduh ka por jong ka Assam bad ka donkam ia ka jingshimkhia lang jong ka Sorkar, ong u Bah Himalaya.
