Shillong Rymphang 24 : Ka National People’s Party (NPP) kala pynkhreh ban thaw ia ka Executive Committee (EC) ba thymmai ha Jaintia Hills Autonomous District Council (JHADC) haba rai ruh ban shong bishar bha bin pa bin ia ka jingshah rem ha Khasi Hills Autonomous District Council (KHADC).
Haba iakren bad ki nongthoh khubor ha ka sngi Nyngkong, u Nongaiktien ka NPP Bah HM Shangpliang ula pyntip ba ki nong ia lam ka party kin sa shong jingialang mynta ka janmiet ban iakren ia ki sienjam ba donkam ban shim haba iadei bad ka JHADC.
“Ngi ioh 13 na ka 29 seat ha JHADC bad khlem pep ngi dei ka party ba bun paid eh. Ka NPP kala pynkhreh bad long kaba khreh ban thaw ia ka EC ha ryngkat ki party ba iasngewthuh jingmut kiba kwah ban iadonlang ha ka kynhun synrop” ula ong.
U Bah Shangpliang ula ong ba ka dang kloi palat ban ong ia ki paralok ki ban wan lang ne iatreilang bad ka NPP. “Hynrei, khlem pep, na kaei kaba nga iohi, ki party kiba la iadonlang ha ka MDA kin iatreilang ruh bad ka NPP ha JHADC” ula ong.
“Nga kwah ban ai khublei ia ki paidbah ka Ri-lum Jaintia halor ka jingkyrshan bad ka jingshaniah ba kila pyni da kaba pynjop haduh 13 ngut ki MDC ia ka NPP” ula bynrap.
Halor ka jingbym lah leh bha jong ka party ha Khasi Hills, u Bah Shangpliang ula ong ba ka dei ka jingshisha ba ka NPP kala leh sniew bha ha kane ka elekshon KHADC da kaba ioh tang 4 seat.
Ha KHADC, ka Voice of the People Party (VPP) kaba jop haduh 17 ngut ki MDC, kala pynkhreh ban thaw ia ka Executive Committee ba thymmai.
“Ha KHADC, ngi la pynieng haduh 25 ngut ki kyrtong hynrei ngi la jop tang 4. Ki don beit ki daw hangne hangtai bad ngi donkam ban bishar bad wad hangno ba ka iaid bakla bad ka party kan sa shong jingialang ha ki khyndiat sngi ban wan ban bishar ia ka jingioh vote jong ka party ha man kawei pa kawei ka constituency” ong u Bah Shangpliang.
U Bah Shangpliang ula ong ba ki kyrtong ka NPP kila wan ba-ar ha kiba bun ki constituency kaba pyni ba ka party kam pat shah kyntait satia ha u paidbah.
“Ngi kwah ban burom ia ka rai u paidbah bad ngi kwah ruh ban iathuh ia u paidbah baka NPP ka dang don ban shakri ia baroh ki paidbah. Na ka party, nga kwah ban ai khublei ia ki paidbah jong baroh ki constituency ba hap hapoh ka KHADC halor ka rai ba kila ai” ula ong.
Une u Nongaiktien ka NPP ula ong ba ki MDC ka NPP ki long kiba kloi ban shong ha ka Liang Pyrshah ha KHADC ha ryngkat bad kiwei ki paralok bad kin ai ruh ka jingshakri kaba paka ia ki paidbah ha kine ki khyndiat snem ban wan ha District Council.
U Bah Shangpliang ula ong ba ka result jong ka elekshon KHADC kam dei satia ka rai ba long pyrshah ia ka Sorkar.
 kala pynkhreh ban thaw ia ka Executive Committee (EC) ba thymmai ha Jaintia Hills Autonomous District Council (JHADC) haba rai ruh ban shong bishar bha bin pa bin ia ka jingshah rem ha Khasi Hills Autonomous District Council (KHADC).){kind=link}