Pynkhreh ki Pulit ia ka jingpyniaid kali ba kyrpang ban duna ka jingdheng
Shillong, Nailar 09 : Ka Nongbah Shillong, kala apkhmih lynti bha ban iohi noh ia ka jingiakhun Shillong Derby (kynhun na Shillong) hapdeng ka Shillong Lajong FC pyrshah ia ka Rangdajied United FC, jong ka 133rd Durand Cup 2024.
Kane ka jingkhmih lynti kan urlong lashai ka janmiet jong ka 10 tarik Nailar ha JN Sports Stadium, Polo.
Kane kan dei ka sien kaba nyngkong ba kine ki artylli ki kynhun na Shillong kin iakhun para ma ki ha ka lympung ialehkai jong ka Durand Cup. Kine ki artylli ki kynhun ialehkai ki dei ruh ki kynhun kiba don bun eh ki paid nongkyrshan hapoh ka Jylla.
La khmih lynti ba ka madan Polo kan dap smam da ki nongkyrshan na baroh artylli ki kynhun ki ban sa wan poi na kylleng ki jaka jong ka Jylla khamtam na ri-lum Khasi bad Jaintia.
Namar kata, ka Tnad Traffic Police ka Shillong, kala pynkhreh mynta ia ka rukom pyniaid kali kaba kyrpang na ka bynta kane ka sngi khnang ba kan nym wanrah ia ka jingdheng kali ne ka jingkhapngiah ka leit ka wan jong ki paid riew ieid phutbol kiba iabeh ban poi sha madan hashuwa ka por ban sdang ka jingiakhun.
U Superintendent of Police (Traffic) K Prasad u pyntip ba kala don ka jingpynbeit ia ka rukom pyniaid kali ha kane ka sngi ka ban treikam naduh ka por 1 baje janmiet haduh da kut ka phutbol.
Ula pyntip bala buh ruh ia ka No-Entry ha ka surok na Lumjingshai sha CRPF Junction bad na Lumjingshai sha Forest Colony bad ki kali kiba wan na Lumjingshai kin hap ban iaid sha ka thain Lawmali bad mih ha Iew Polo bad sa khun sha ka diang.
La kyntu ruh ia ki nongniah kali ba kim bit ban pynieng kali ha ki thain Polo ha kane ka sngi naduh ka por 11 baje mynstep. La khang ban pynieng kali harud ka surok naduh Golflink shaduh ka CRPF Junction.
Une u Heh Pulit ula kyntu ia ki paidbah ba kin pyndonkam da ki carpool/ki taxi kamai ha ka jaka ki kali shimet ba kin wan peitkai ia ka jingialehkai hapdeng kine ki ar kynhun ka Nongbah Shillong.
U pyntip ba la khang ruh ia ka jingiaid jong ki kali heh na ka thain Polo ha ka 10 tarik Nailar.
