Shillong Jylliew 23: Ka jylla Meghalaya kala pynkhreh shaid shaid ban pynkhring shuh shuh ha ka kam jngohkai lyngba ka jingtei ia ka Skywalk ha ka thain Mawkdok ha East Khasi Hills district ha ka jinglut jingsep kaba kot T.51.7 Klur.
Ia kane ka project la pynwnadur ne Design ba kan long kawei hapoh ka ri India kum ka ‘Longest Cantilever Skywalks’, ia kaba la pyndep ia ka jingkhot tender bad la khmih lynti ba ka jingshna ia kane kan sa sdang noh hadien ba la dep ka aiom lyiur.
U Myntri Rangbah ka jylla u Conrad K. Sangma ula pynbna ia kane hynne ka nsgi Nyngkong ha ka jingleit jngoh ia ka shnong Mawkdok, ha kaba la pynlong ruh ia ka prokram “CM Connect” kaba u Myntri Rangbah ula iakren bad sngap ia ki jingpynsngew jong ki paidbah.
Ia kane ka Skywalk kan dei ka jingtei kaba kyrpang jong ki engineer kaba la pynwandur ban rah shajrong ia ka jingshem jong ki nongwankai.
Kan don ia ka jingjrong kaba 40 mitar, kaban kynthup ia ka Cantilever Section kaba iar 7 Mitar. Kane ka design kaba kyrpang kadei kaba la pynwandur ban ailed ia ki nongjngohkai ban peit ia ki jingitynnad jong ki jaka, ki riat ki ram bad kiba khring ia ka thain Mawkdok.
La khmih lynti ba kane ka project kan khring bha ia ki nongwna jngohkai bad kan kyntiew ruh ia ka ioh ka kot ha kane ka shnong bad ban thaw ia ki kabu kiba thymmai ha kane ka thain.
Haba phai sha ka prokram jongka CM Connect, la sakhi ia ka jingwan iashimbynta jong ki nongshong shnong ryngkat bad ki nongmihkhmat na ki shnong ki thaw kiba la pynpaw ia ki jingsngewkhia ha kaba iadei bad ki surok, ka bording elektrik, ka koit ka khiah, ka jingshna iing, ka umbam umdih, ka jingai jingshakri ki Bank bad ka jingpyntreikam ia ki skhim ha kaba iadei bad ka bha ka miat jong ka Sorkar Pdeng bad Sorkar Jylla kiba kynthup kum ia ka PMAY, NFSA bad Jal Jeevan Mission.
Haba kren ha ka jingialang, u Conrad K. Sangma ula ong, “Ha ka CM Connect, ngi kren tang khyndiat hynrei ngi sngap kham bun. Kane ka rynsan kam dei ka jaka ban ia kynnoh ne ban wad daw, kadei ka lad ban sngap, ban pyni bad ban leh. Baroh ki leh bakla, hynrei kaba kham kongsan kadei ka mon jong baroh lang ban pynbeit ia ki jingeh bad ban iaid shakhmat da ka jingmut kaba bha”.
U Myntri Rangbah ula pyntip ba ka jingthmu jongka CM Connect ka long ban sngap beit ia ki jingpynsngew jong ki nongshong shnong bad ban shimkhia ia ki jingpynpaw ki jongki kum ki jingthmu ne plan treiakm jong ka sorkar. “Da kaba wanrah ia ka jingshakri ka sorkar sha ki shnong ki thaw, ka sorkar ka ielh ban tei ia ka jingbuh ia ka jingkhein jingdiah, ka khuid ka suba ha ka rukom treikam bad ka jingshaniah” ula ong.
“Kane ka prokram kan kyntiew ia ka rukom treikam ban buh ia ki jingkhein jingdiah. Nga la iohi ba wat ia ki kam barit, lada ioh ia ka jingbtin lynti na ki nongshong shnong ka lah ban wanrah ia ka jingkylla. Kam dei na ka bynta uwei u ophisar ne ka tand sorkar, kadei na ka bynta ka jong ngi, ka sorkar kaba don ia ka jingiatreilang, kaba shim ia ka jingkitkhlieh bad kaba iatrei lang bad baroh” ong u Myntri Rangbah.
Ula ai khublei ia ki MLA kiba kynthup ia u Bah Gavin Miguel Mylliem bad u Bah Matthew Beyond Kurbah bad ia ki ophisar kiba la donlang, halor ka jingshimkhia ka jongki ha kaban jubab ne pynshai ia ki jingsngewkhia kiba la pynpaw da ki paidbah.
Hadien katei ka jingialang, u Myntri Rangbahu haba iakren bad ki paidbah ula kyntu ia ki ba kidei ba kidei ban pyniasoh ia u Aadhaar jongki bad ki scheme bapher bapher bad ula pynkynmaw ia ki ba ka Tarik kaba khatduh kadei ha ka 30 tarik u Jylliew ban ioh ia ki jingmyntoi na ka PMAY, MHIS, NFSA bad ka Job Card.
“Ngi kwah ban pynthikna ba ym dei ban don mano mano ruh kiban shah ieh shadien. Kine ki prokram ki dei ki jingpyni ia ka jingthmu ka jong ngi ban ai ka jingshakri kaba kham bha da kaba sngap bad shah shkor” ula bynrap.
Ha ka jingpyrshang ban pynkup bor ia ki shnong ki thaw bad ban kyntiew ia ka jingsenkam ha ki shnong ki thaw, ka bam kaba la sam ha ka jingialang jongka CM Connect Programme ha Mawkdok hynne ka sngi, kadei kaba la pynkhreh bad pynbiang da kawei ka Self-Help Group (SHG). Kane ka sienjam, kadei kaba la pynwandur da u Myntri Rangbah ka jylla u Conrad K. Sangma kaba dei shi bynta jongka jingiohi jngai ban pynlong ia ka jingpynlong prokram ka sorkar kaba long kyllum bad kaban wanrah ia ka jingkylla ha ka ioh ka kot na ka bynta ki shnong ki thaw ha ki thain nongkyndong.
“Haba ngi pynlong ia kum kane ka prokram ha ki Block, kadei ka jingkitkhlieh ban pynthikna ba baroh, naduh ka bam kaba sam kadei kaba ka thied na katei ka thain. Da kane ka lynti ngi pynshlur ia ki SHG, ki kam kiba ialam da ki longkmie bad ki kynhun jong ki shnong ban ialam nakhmat bad ban ioh jingmyntoi na ki sienjam jong ka sorkar” ula ong.
U Myntri Rangbah ula ong, da kaba pyndonbynta lang ia ki SHG ha kaban pynbiang ia ki jingdonkam kum ka bam, ka leit ka wan bad ki tiar ki tar bad ban pynbiang ia ka jaka pynlong jingialang, ka sorkar kala thaw ia ka nuksa jong ka roi ka par jong ka jingdon bynta lang da baroh ha ka shnong ka thaw kam dei eh tang ban ioh jingmyntoi hynrei ka jingsiashimbynta lang da baroh hi.
U Myntri Rangbah ula bthah ba nangne shakhmat ia baroh ki prokram jong ka CM Connect kiba pynlong ha ki Block yn buh hakhmat ia ka jingthied bad jingpynbiang ia ka bam, ki jingdonkam bad kiwei kiwei na ki nongshong shnong.
Ula kyntu ia ki ophisar jong ki Block bad ia ki nongpynlong ia ki prokram ban iatreilang da kaba iajan bad ki SHG bad ki shnong ki thaw ban pyntreikam ia katei ka sienjam ba kan long kaba iaid beit iaid ryntih.
“Kane ka long kaba rit hynrei kaba khlain pat ha ka lynti ban pynthikna ba man la ka pisa kaba ngi pynlut ha kitei ki prokram kan poi biang sha ka ioh ka kot jong ka shnong ka thaw” la ong u Myntri Rangbah.
