Shillong, Nailar 09 : Ka Meghalaya Board of School Education (MBoSE) kala pynkhreh lut nadong hadong ha kaban pynlong noh artylli ki Board Exam ha ka shisnem, ka ban sdang naduh u snem 2025.
Ka jingthmu ka long ban ailad ia ki samla pule kiba shah bat (failed) kin ioh iakhun biang ia ka board exam tang hapoh ka shibnai-arbnai hadien ba ki shah bat ha ka eksamin.
Kane ka rai jong ka Tnad Pule Puthi kala wan da kaba pynkylla ia ka Meghalaya Board of School Education Regulation for Secondary School Leaving Certificate Examination,2011 kaba la mynjur da ka jingialang jong ka Kynhun Myntri bala pyniaid da u Myntri Rangbah ka Jylla Conrad K Snagma hynne ka sngi Thohdieng
“(Da kane ka rai), ka MBoSE kan pynlong noh artylli ki Board Exam ha ka shisnem naduh u snem pule 2024 shakhmat” ong u Myntri ka Tnad Pule Puthi Rakkam A Sangma haba iakren bad ki lad pathai khubor hadien ka jingialang.
“Ka Board Exam ba nyngong kan long noh ha u bnai Rymphang ne sdang taiew u Lber bad ka Board Exam kaba ar, kan long na ka bynta kito ki shah bat ha baroh ki sobjek lane kawei lane ar-lai tylli ki sobjek. Yn shah iaki ba kin iakhun ia ka Board Exam hapoh ka shibnai-arbnai eiei kata mut hapoh u bnai Jymmang” ula ong.
Kat kum ka jingong u Myntri, ka rai jong ka Sorkar Jylla ka dei kaba iaid kat kum ka National Education Policy (NEP).
“Ia kane la leh ban kyrshan ia ki samla pule namar mynta ka supplementary exam ki dei kiba ju pynlong hadien ka shisnem hynrei mynta ka supplementary exam kan long noh hapoh ujuh u snem ban pyllait ia ki khynnah klas X na ka jingsepei kai shisnem” ong u Myntri.
U Rakkam ula pyntip ruh “Khnang ban tyngkai ia ka por khnang ba ki samla pule kin ioh ban rung klas ha ki snem ban wan lehse ha u 2025-26, ka Board Exam ba nyngkong kan long ha u bnai Nohprah lehse ha ka taiew ba lai ne ka saw jong u Nohprah 2025. Ka Board Exam kaba ark an long ha u bnai Rymphang lane Lber, 2026 hynrei ia une u snem pule ba mynta, yn pynlong ia baroh artylli ki eksam hapoh u bnai Rymphang bad Jymmang”.
Ha kajuh ka por, u Myntri ula pyntip ba kan nym don shuh ruh ka optional paper lane best of five naduh u snem pule jong u 2026-27.
“Naduh u snem pule 2026-27, baroh ki samla pule kin ap ban pass ia baroh hynriew tylli ki sobjek ha ka eksam jong ka Board” ula ong.
 kin ioh iakhun biang ia ka board exam tang hapoh ka shibnai-arbnai hadien ba ki shah bat ha ka eksamin.){kind=link}