Shillong,Naiwieng 21: Hadien ba kut noh ka samoi iakhun ka Ranji Trophy, ka kynhun ialehkai cricket ka Jylla kan khreh pat ban aireng sa ha ka lympung ialehkai ka Syed Mushtaq Ali Trophy 2025-26.
Ha kane ka kynti kaba mynta, la sngewthuh ba ki nongialehkai kiban mihkhmat ia ka jylla sha kane ka lympung kham bun na ki, kin dei ki samla ialehkai na kane ka jylla, ha kaba khlem shim la kynthup ne ban pynrung satia ia ki nongialehkai kiba na shabar ne wat ia guest player.
Tangba ka jingjied ia ki player baroh ka shong na ka jinglah ban paw ne ban ialehkai bha na ka lympung ialehkai ba dang shu dep ka Ranji Trrophy bad bynrap lang ruh bad ki player kiba la dep ban don bynta sha ka prokram jingpynkhreh kaba la long ha Jagiroad, Assam.
Ha kane ka kynti kaba mynta, ka Meghalaya kan sdang ba kan iakhun pyrshah nyngkong ia ka Sikkim ha ka 26 tarik mynta u bnai bad kiwei pat ki kynhun ba la pyniakap lang ha kane ka juh ka thup ki long ka Arunachal Pradesh, Mizoram, Manipur bad Nagaland.
Ka kynhun kan mih na kane ka jylla sha Pune ha ka 23 tarik mynta u bnai.
Ki kyrteng ki player: Kishan Lyngdoh, Arpit Bhatewara, Akash Choudhary (C), Abhishek Gupta, Kush Agarwal, Lerry G Sangma (VC), Aaron Nongrum, Rohit Shah, Sengsrang K Sangma, Swastic Chettri, Badonnam J Mylliemngap, Ram Gurung, Swarajeet Das, Himan C Phukan, Agreas Chamcham Sangma
Standbys: Dippu Sangma, Jaskirat Singh Sachdeva, Anish Charak, Riboklang Hynñiewta, Arien Bonchang Sangma
