Shillong, Naiwieng 21 : Ka Commissionerate of Food Safety, Meghalaya, kala bthah ban weng lut noh mardor ia baroh ki jingdih bala ai kyrteng kum ki “jingdih ORS’ lane ba pyndonkam ia ka ktien “ORS” ha kano kano ka rukom ba shukor na baroh ki dukan, pharmacy bad ki clinic ki doktor ha Jylla.
Ha ka jingpynbna paidbah bala pynmih ha ka sngi Thohdieng, ka Deputy Commissioner (Food Safety) Kong DBS Mukhim, kala pynpaw ba ki nongdie lang (wholesaler) bad ki nongsam (distributor) ki dei ban phah pynphai biang ia kum kine ki mar bad ban pynphai pat ia ki sha ki nongshna ba kin ai kyrteng thymmai kaba iahap kat kum ki jingbthah ka FSSAI.
“Baroh ki nongdielang/nongsam la bthah ba kin phah pynphai biang mardor ia kine ki mar na ki dukan ba ki dieha ki Iew kynthup ki Pharmacy bad ki Clinic bad ban phah pat iaki sha ki kompani ba shna ba kin ai kyrteng thymmai kat kum ki jingbthah ka FSSAO” kala ong.
“La bthah ia ki ba kin bud ia ka Standard Operating Procedure (SOP) bala pynmih ban lah ha kaban lapdien pura shano ki mar ki poi. Ka jingpyntreikam bad jingkhmih ia kane ka kam yn hap ban leh da ki Ophisar bala buh bad ki Food Safety Officer ha baroh kawei ka Jylla” kala bynrap.
Ka kong Mukhim kala ong ba kane ka jingleh ka long katkum ka jingpyntreikam ia ka hukum ai jingpynshai jong ka FSSAI ba pynmih ha ka 15 tarik Risaw, 2025, kaba ong ba kum kine ki jingdih ki dei kiba ai kyrteng thok bad ialam bakla namar kim shym la kot ha ka rukom shna jong u Oral Rehydration Salts (ORS) hapoh Food Safety & Standards Regulations.
Ka FSSAI ka pynshai ba u ORS u dei u mar sumar jingpang bad ym lah ban shu die bad pyniaid iew kum ki jingdih kai.
Kino kino ki mar ba pyndonkam ia ka kyntien “ORS” ha ka sop thoh kyrteng ban iadih paidbah ka dei kaba ai kyrteng thok bad ialam bakla bad dei ban weng noh na ki Iew, Pharmacy bad ki Clinic khlem ka jingpynslem.
Ka Commissionerate ka pan ia ka jingiatreilang ba pira ban pynthikna ba ki nongthied nongpeit kin ioh jingiada na ki jingshah ialam bakla bad ki mar ki bym bha.
