Shillong Nohprah 10: Ka Executive Committee jong ka Khasi Hills Autonomous District Council (KHADC) ha ka sngi Balang, kala rai ban wanrah noh ia ka Rules jong ka Market Act, ka ban khang pyrshah ia ka jingot kilo ia ki marrep ba wan die da ki Nongrep sha ki iew ki hat ha Ri-lum Khasi.
Ia kane la pyntip da u Chief Executive Member (CEM) ka KHADC Bah Pyniaid Sing Syiem haba iathuh ba ka Dorbar Tlang jong ka Council kan long ha ka 19 bad 20 tarik mynta u Nohprah.
Haba iakren bad ki lad pathai khubor, u CEM ula ong ba kawei na kine ki rules ka dei ka Khasi Hills District Establishment, Management and Control of Market Rules 2024 kaba pynshong nongrim na ka Khasi Hills District Establishment, Management and Control of Market Amendment Act 2023.
“Ka jingmyntoi lyngba kane ka Rules ka long ba ki nongrep ha kylleng sawdong jong ka Ri-lum Khasi (5 District) kiba hap hapoh u pud u sam jong ka KHADC kim dei shuh ban shah ot kilo ki marrep haba ki leit die sha ki iew ki hat ha ri Khasi” ong u CEM.
Ula ong ba ka Council kala ioh ia ka bor lyngba ka aiñ kan thaw ia ka Sub Committee bad ha kane ka Rules kan kham pynshai shuh shuh ba kan ym don kata ka jingot kilo la ka long ha ki iew jongka District Council, Hima, Shnong ne jong ki riewshimet.
U CEM ula ong ba kan don ruh kawei ka Committee kaban shim ia ka rai ban pynshitom ia kino kino kiba iaid pyrshah ia kane ka Rules khamtam ha kaba iadei bad ka jingot kilo ia ki marrep jong ki nongrep katkum ba la bthah ha katei ka Rules.
