Shillong, Risaw 11 : Ka Jylla kala pynkhreh biang mynta ban pynlong ia ka tamasa kieng lieng Kayak bala tip kum ka Meghalaya Kayak festival 2023 ka ban pynlong ha ka Wah Umtrew, kaba hap hapoh ka shnong White Water, Umtham, Ri-Bhoi District.
Kane ka tamasa kan dei kaba hynriew bala pynlong ha ka Wah Umtrew. Kane ka tamasa kan long ha ka 12 tarik haduh 14 tarik Risaw bad la khmih lynti ba bun ki nongkieng lieng na kylleng ki ri ka pyrthei kin wan ban iashimbynta.
Ia kane ka tamasa yn pynlong da ka Ri-Bhoi Water Sports & Tourism Cooperative Society Ltd ha ryngkat ka jingiatreilang bad ka Tnad Sports & Youth Affairs ka Jylla.
Ha u snem bala lah, bun ki nongkienglieng bala paw ka pyrthei kiba wan ban iashimbynta bad kine ki kynthup ia kiba la ialehkai ha ka Olympics ba kynthup ia u u Giovanni De Gennaro na Italy, ka Sofia Reinoso na Mexico, ka Vavra Hradilek na Czech Republic, ki World Champion ba kynthup ia u Nouria Newman na France bad u Adrian Mattern na Germany.
Kumba 15 ngut ki nongkieng lieng napoh ka jylla Meghalaya kiba la dep ban ia shimbynta ha ka jingiakop niahlieng kayak ha ka National Level Kayaking Competition ha Kerela, kila iashimbynta ha kane ka tamasa bala lah.
Ia kito kiba kwah leit peitkai, ki nongpyniaid kila pynbeit ia ka bos ba shong 40 ngut, ka ban ieng ha Khyndailad naduh ka por 6:30 bae mynstep haduh 7 baje mynstep ha kine ki sngi.
