Shillong, Jylliew 22 : Ka Jylla kala pynkhreh shaid shaid ia ka jingwan jong ka tamasa Cherry Blossom 2025 ha Shillong, ka ban long ha ka 14-15 tarik Naiwieng, kaba kular ia ka put ka tem ki kynhun ba pawnam ka pyrthei, ki cultural event ha kylleng ka Sor bad ka ban pynhun hi jrut ia ki paidbah kiba wan sha ka tamasa.
Ia kane la pynbna da u Myntri Rangbah ka Jylla Conrad K Sangma ha ka jingrakhe ia ka World Music Day kaba la long ha Lariti Auditorium.
Mynta u snem, ka tamasa kan pynleit jingmut eh ha sor Shillong da kiba bun ki jingpynbyrngia bad kiba pyni ia ki kolshor ka Jylla, kiba thmu ban pyni paidbah ha kylleng ki jaka ka sor- ki jingbatai halor ka Nan Polok bad kiwei ki jaka ba don ki jingtei u men barim. Ka rynsan iaput iatem kaba heh duh kan long ha Jawaharlal Nehru Stadium ha ryngkat ka madan MFA bad SRTG ban pynheh shuh shuh ia ka jaka leh tamasa.
Ka tamasa ha ka sngi Nyngkong:
* Jason Derulo, u khlur rwai pop-R&B na Miami, USA, un wan ban pynshongshit da ki jingrwai ba paw bha jong u (Swalla, Talk Dirty, Savage Love) ha Shillong ha ryngkat ki 15 ngut ki nongshad. U Derulo u dei uwei na ki 10 ngut ki nongrwai ba wan hakhlieh duh napdeng ki nongrwai ka pyrthei uba nang ban shad-uba pyniahap ia ka sur rwai bad ka shad ha kajuh ka por kaba bun kim kham lah satia ban leh.
* The Script, kaba dei kawei na ki kynhun tem rock ba pawnam na Ireland, kan mih lang ha kane ka sngi ha ryngkat u Derulo. Kane ka kynhun tem kaba la die ia ka album ia palat 20 million copy ha kylleng ki Ri ka pyrthei, ka don ia ki nong kyrshan ha kylleng ki jaka, khublei ia ki jingrwai jong ka kum ka Hall of Fames, Breakeven bad The Man Who Can’t Be Moved. Kane ka jingwan tem jong u kan dei ruh ka jingpynurlong ia ka jingap khmih lynti bala slem bha jong ka Ri India b aka kynhun kan wan iuhkjat.
Ka tamasa ha ka sngi Ba-ar :
Ia ki kynhun nongput nongtem yn sa pynbha kham hadien ha kaba ki nongpyniaid kila kular ba ki kynhun kin dei kiba la pawnam bad kiba tbit.
Ka jingdie ia ki ticket kan sdang haka taiew ba khatduh jong u Jylliew bad lah ban ioh ia ka tang na ka www/RockskiTickets.com
Ka Cherry Blossom 2025 kan ym kut tang kum ka tamasa hynrei kan iarap ban kyntiew bha ia ka ioh ka kot ka Shillong, ki kam jngohkai bad ka jingithuh ha ka pyrthei.
