Shillong, Jymmang 19: Ka Meghalaya kan sa pynthymmai biang ia ka jingiatehkular na ka bynta ban pynlong ia ka 2027 National Games ha ka 30 tarik u Jymmang, ha kaba u Myntri ka Sorkar Pdeng uba khmih ia ka kam ialehkai un wan ar sngi ban iashimbynta ha ka jingialang jong ka Eastern Zone meeting, pyntip da u Myntri ka tnad Sports and Youth Affairs ka Jylla Bah Wailadmiki Shylla ha ka sngi Baar.
U Bah Shylla ula iathuh ba ka jylla kala ioh ia ka jingtip mynta ka taiew shaphang katei ka jingwan.
“Dang hynin ka sngi, nga lah ioh jingtip da ka ktien. Ngam pat ioh ia ka jingtip kaba paka da ka jingthoh kumba long haduh mynta, hynrei katkum ka jingtip kaba nga lah ioh, u Myntri ka Sorkar Pdeng ryngkat bad u Myntri Khynnah ka Sorkar Pdeng uba khmih ia ka kam ialehkai bad ki heh ophisar ka tnad ialehkai kin wan sha Shillong ha ka 28 tarik u Jymmang” ula ong.
Kane ka jingwan kadei ruh halor ka jingpynlong ia ka Bharat Group Meeting na ka bynta ka Eastern Zone. “Ha ka 28 bad 29 tarik u Jymmang kan don ka jingialang jong ki kynhun ka Bharat Group kiba don ha man la ki jylla. Kane ka jingialang kan dei na ka bynta ka Eastern Zone kaban kynthup ia baroh ki jylla ka thaiñ shatei lam mihngi ka ri, ka West Bengal bad ka Odisha,” la ong u Bah Shylla.
Ka kynhun jong ka Meghalaya kala don ha New Delhi ha ka taiew kaba la dep ban iakren halor ka jingiatehkular na ka bynta ka National Games, ia kaba la iasoi nyngkong eh 8 snem mynshwa.
“Ha ka taiew kaba lah dep, ka kynhun na Shillong kala leit sha Delhi ban iakynduh ia ki heh jong ka Sports Ministry ha kaba iadei bad ka jingpynthymmai ia ka jingiatehkular ban pynlong ia ka National Games ha u snem 2027” la ong u Myntri Sorkar.
“Ki don ki bynta kiba hap ban pynbeit namar ba kadei kaba la slem bha. Dei halor kane ba ngi kwah ban pynthymmai ia ka jingiatehkular”.
U Bah Shylla ula ong, ba u Myntri ka Sorkar Pdeng uba khmih ia ka kam ialehkai ula tyrwa ba ia katei ka jingsoi ia ka jingiatehkular dei ban pynlong ha Shillong. “Haba ngi lah kren ia ki, u Myntri hi dalade ula ong, ba kan bha shibun ba ngi leh ia katei hapoh Shillong. Kumta katei kan sa jia ha ka 30 tarik u Jymmang” ula ong.
Ula pynthikna ba katei ka jingiatehkular kadei kaba la pynkhreh tangba ka donkam ban pynkylla kumba la ai jingmut da ka Indian Olympic Association. “Ngi lah dep ban iasoi ia ka jingiatehkular hynrei kila don pat ki katto katne kiba ngi hap ban pynbeit kiba la leh da ka Indian Olympic Association (IOA)” ula ong.
U Bah Shylla ula ong, ba ki dang ap ia ki jingtip kiba bniah na ka kynhun kaba leit sha Delhi. “Ngam shim la don bynta lang ha katei ka jingialang bad ka kynhun. Ia mynta hi, ki dang pynkhreh, kumta ha kine ki khyndiat sngi ngin sa ioh ia ki jingtip kiba pura” ula ong.
Haba ai jingtip halor ka jinglong jingman, u Myntri ula ong, ba ki jingleit jurip kila long kiba biang.
“Ka jingpynkhreh ki long kiba iaid bha kumba long mynta. Ngam shim la ong ia kane tang ba nga dei u Myntri ka kam ialehkai, hynrei nga ong ia kane, hadien ba lah leit jurip bunsien na ka Sports Ministry bad ka sien kaba khatduh na ka IOA. Bun ki briew kiba la wan ban jngoh bad pynlong ia ka jingjurip ha ki jaka kila dap ia ka jingsngewhun ha kaba iadei bad ka jingpynkhreh kumba ka long mynta” ula ong.
Ha kaba iadei bad ki jingtei, ula bynrap, “Na ka bynta ki jingialehkai ki bapher bapher, kin don la ki jong ki jaka ialehkai. Kumba long mynta, ngi don bun tylli ki madan ialehkai ban pynlong ia ki jingialehkai kiba hapoh ne Indoor bad kiwei kiwei ki jingialehkai bad ngi lah don ruh ia ki madan ialehkai kiba ngi lah pynap lypa”.
Ka jylla kala bhah T.600 Klur na ka bynta ka National Games bad kala pan ruh ia ka jingiarap pisa na ka sorkar pdeng.
“Ka jingmang tyngka baroh kaba ngi khmih kan kot ia ka T.600 Klur. Kumba long mynta, kane kan long na ka jingpynlut na ka pisa jong ka sorkar jylla hynrei ngi lah iaid shakhmat pat ban iakren bad ka sorkar pdeng” ong u Bah Shylla bad ka bynrap “Nga lah ban ong, da kaba thikna, kan shong baroh ha ka sorkar pdeng hynrei ia mynta hi, ngi dang iaid lyngba ka pisa jong ka sorkar jylla”.
