Shillong Risaw 09: Ka Fashion Society Shillong, kala pynbna ba pynlong iaka Miss Shillong 2023 bad Ms Supermon Beauty Pageant ha ka 14 tarik u Risaw ha Soso Tham Auditorium, Shillong kum shibynta na ka jingrakhe dap 40 snem ka seng.
Kane ka jingiakop thei bhabriew kan sdang ha ka por 4 baje janmiet, pynbna u Secretary, Public Realtion ka FSS R.L Sohlya ha ka kyrwoh bala phah hynne ka sngi Nyngkong.
La pnyntip ba ka FSS kala pynlong iaka audition mynta la 2 bnai tam bad kala jied ia ki thei bhabriew kiba don sap, kiba la pyndep iaka jingioh jinghikai ha kaba iadei bad ka rukom kren, rukom iaid ‘Catwalk’ bad ban tei iala ka longrynnieng.
La iathuh ba katei ka jingiakob kan sdang da ka jingpyni ia ka riam tynrai ban sa pynbud da ka jingshad kaba la pynwandur da ka Ribha War Lyngkhoi bad ia ka Grand Finale la pynwandur da u Chris Kurbah bad ka Naphisa Pala.
Ka Fashion Society Shillong kan pynlong ruh iaka Ms Supermom Beauty Pageant, ka jingiakob na ka bynta ki ‘Single Mother’ ne ki Longkmie kiba kyrshan marwei ia ka ïing bad kane ka rynsan kan pynkup burom iaki ba kin lah ban pynurlong iaka jingphohsniew bad ka jingangnud ka jong ki bad ban sdang biang ia ka jingim kaba thymmai.
Ki nongjop iaka Miss Shillong, kin ioh iaka Pansngiat, ka pisa T. 1 Lak, T.75,000 bad T.50,000, katba ki nongjop ha ka Ms. Supermom kin ioh iaka Pansngiat ka pisa T.50,000, T. 30,000 bad T. 20,000.
Kiba ioh ia kiwei pat ki khusnam kum ka Miss Beautiful Eyes, Miss Beautiful Skin, Miss Beautiful Hair, Miss Beautiful Smile bad Miss Catwalk kin ioh mar T.5000.
Ha katei ka sngi, ka FSS kan pyni ruh ia ka sap jongka Liza Lyngdoh, kaba tbit ban tem iaka Guitar, kaba dei na ka shnong Mawkyrwat bad mynta ka Liza ka ai jinghikai tem ha Bangalore.
