Pynkhreh ka Assembly bad NYK ban pynlong ia ka Viksit Bharat Youth Parliament ha Shillong

Shillong, Lber 25: Ka Meghalaya Legislative Assembly ha ryngkat ka jingïatreilang bad ka Nehru Yuva Kendra Sangathan (NYKS) bad ka National Service Scheme (NSS) kan pynlong ïa ka State Round jong ka Viksit Bharat Youth Parliament 2025 ha ka 27 tarik Lber 2025 ha Lariti International Centre for Performing Arts and Culture, Mawkasiang.

Ka Viksit Bharat Youth Parliament ka dei ka sienjam ba iohi jngai da ka tnat Ministry of Youth Affairs & Sports kaba ïahap bad ka Viksit Bharat@2047 Framework kaba angnud da u Myntri Rangbahduh ka Ri Narendra Modi.

Ka thong jong ka Viksit Bharat Youth Parliament 2025 ka long ban pynshlur ïa ki samla ban ïashim bynta ha ka jingthaw polisi, ka synshar khadar, bad kiwei kiwei ka ban pynurlong ia ka jingkhot u Myntri Rangbahduh ban pyniadon bynta ïa shi lak ngut ki samla ha ka saiñ pyrthei.

Kane ka jingïalang kan ai ka rynsan ia ki samla kiba hapdeng 18-25 snem ba kin ïashim bynta ha ki jingïakren ha kylleng ki kyrdan bapher bapher, kynthup ha ki District Node, State, and National Rounds.

Ki nongiashim bynta kin iamir jingmut halor ki mat jong ka imlang sahlang, ban pynroi ia ka jingiakren paidbah kaba don jingtip bad ban kyntiew ia ka jinglah ban shim rai jong ki. Ka jingthmu jong ka jingialang kadei ruh ban pynroi ia ka jingburom ia ki jingpyrkhat bapher bapher bad ban pynpaw ia ka jingdonkam jong ka jingiakren kaba don ka jingpyniaid beit hapoh ki tnad synshar paidbah.

Ki phang ban ïakren ha ka jingïalang ki long “75 Years of the Indian Constitution: A Journey of Rights, Duties, and Progress” and “The 11 Sankalp of Samvidhan Divas: A Pledge to Strengthen India’s Constitutional Values.

Ki 3 ngut ki ban shah jied na kawei pa kawei ka Jlla kin leit sha ka National Level, ha kaba kin kren halor ka phang “One Nation, One Election: Simplifying Democracy, Amplifying Progress, Ensuring Stability.”