Shillong, Rymphang 10 : Ki bor Sorkar kila pynkhreh janai bha ia ki jingdonkam baroh namar ka jingwan jong ka concert u Ed Sheeran ha JN Stadium, Polo ha ka 12 tarik u Rymphang.
Haba kren sha ki lad pathai khubor ha ka sngi Nyngkong, ka Deputy Commissioner ka East Khasi Hills Kong RM Kurbah kala ong ba palat 26000 ngut ki briew la khmih lynti ba kin wan sha kane ka concert bad baroh ki jingpynkhreh kila biang lut nadong hadong.
“Ngin plie ia ki khyrdop ha ka por 4 baje janmiet. Ngi don ka jingsngewkhia khyndiat namar ba don tang artylli ki jaka rung. Ta ka daw ngi la khot ia kane ka jingialang ban pyntip sha baroh kito ki briew ba wan sha ka concert ba kin sngewbha ban wan kham kloi khnang ban kan nym don ka jingiaknieh rung” kala ong.
Kat kum ka jingong jong ka, kin don lai tylli ki khyrdop ban mih ia kaba la pynkhreh.
“Ki khynnah ba hapoh ka 5 snem ka rta yn ym shah satia ban wan sha ka concert” ong ka kong Kurbah haba pyntip ba ki nongleit concert ki lah ban rah tang lai tylli ki tiar-ka mobile phone, ki shabi bad ki bek pisa.
Haba kylli, ka DC kala ong ba ki bor District kim don jingthmu ban khang ia ki skul namar ka concert bad bynrap “Hynrei ngi hap ban pyrkhat lypa bad pyllait ia ki samla pule na ka jingsahkut. Ngi kwah ban kiar na kane bad dei ta ka daw ba ngi la pyntip ia kane”.
Halor ka jingpynbeit iaid kali, u Superintendent of Police ka District Bah Vivek Syiem ula pyntip ba kan don ka ‘No entry” ha kiba bun ki jaka bad kine ki kynthup ia ka no entry ha Lad Lumjingshai sha lad CRPF Camp, Lumjingshai sha Police Colony, Lawmali sha Polo, Golflink sha Polo, City HutDhaba sha Polo, BJP Office sha Oakland, Polo, BK Bajoria sha Fourth Forlong, Gurudwara sha St.Anthony’s College.
Haba phai sha ki jaka pynieng kali, u SP ula ong “Ngi don katto katne ki jaka ha kaba ki paidbah ki lah ban pynieng ia ki kali jong ki. Kine ki jaka ki dei – Red Field, Golflinks, pynieng harud surok na TRS Restaurant sha CM Connect office, pynieng harud surok ha ka thain Golflinks, FCI junction sha Lumjingshai junction, state central library campus bad state convention campus.”
Halor ki bor pahara, u Bah Vivek u iathuh ba kin don lai kyrdan ki jingtalasi hashuwa ban rung sha stadium. U ong ba ki Pulit kin peit ia kine ki jaka ha ryngkat ki bor pahara jong ki nongpyniaid.
Kat kum ka jingpyntip ki nongpyniaid, ka kynhun ban plie ia ka concert kan sdang ban kiew rynsan naduh ka por 6:15 baje janmiet ha ka 12 tarik Rymphang”.
