Nongpoh, Rymphang 23 : U Deputy Commisssioner ka Ri-Bhoi uba dei ruh u District Election Officer (DEO), hynne ka sngi Palei, ula pyntip ba ula pynkhlain bha ia ka bor pahara ha Block-II kaba dang don hapdeng ka jingiakajia pud hapdeng ka Assam-Meghalaya, ban pynthikna ba ki nongthep vote kin ioh ban leit pyndep ia la ka hok ban jied ia ki Nongmihkhmat sha ka Iingdorbar Thaw Ain ka Jylla, khlem kano kano ka jingshah pynthut ne khanglad.
Kane ka jingpynjur pahara kala mih ruh hadien ba mih ka jingbyrngem na uwei u MLA na West Karbi Anglong, ba byrngem ban nym shah ïa ki paidbah ban iathep vote ha katei ka thain khappud ha kane ka election MLA hapoh ka jylla Meghalaya.
Haba ïa kren bad ki Nongthoh Khubor, u Deputy commissioner Arpit Upadhaya u la ïathuh ba na ka liang ka bor District ka la pynjur ïa ki bor pahara ha ki shnong khappudka Block-II hadien ba uwei na u MLA na West Karbi Anglong u la byrngem ban nym shah ïa ki paidbah ba iathep vote ha ka thain.
“Ban lait na kino kino ki jingshah pynthud bad ban ïaid beit ïaid ryntih kane ka election bad ruh ban nym don kano kano ka jingpyntieng pynsmiej ïa ki nongthep vote, ka bor District ka la dep phah ïa ki bor pulit, ki CRPF ba kin pahara man ka sngi ha ki shnong khappud ka Block II” ong u Arpit Upadhaya.
U la ïathuh ba kum u Deputy Commissioner ka Ri Bhoi u la dep ïa kren ruh sha u Deputy Commissioner ka West Karbai Anglong bad kumjuh ruh u Chief Secretary ka jylla Meghalaya u la dep ban phah da ka jingthoh sha u Chief Secretary ka Assam bakin shim khia bad pynthikna ka kam dei ban nym don kano kano ka jingpynthud na ka liang ka Assam ha kane ka jingthep vote .
U pyntip ba na ka liang ki heh sorkar ka Assam ruh ki la pynthikna ba kin ïa trei lang ban nym don kano kano ka jingshah pynthud jong ki nongthep vote sha ka jylla Meghalaya, u la ong.
Une u Khliehduh ka District ula ong ruh ba ka bor district ka maham ïa kino kino kiba pynmih ïa ki khubor thok ne kino kino kiba ktah ïa ka jingïaid beit ïaid ryntih ka jingjied nongmihkhmat hapoh ak District bad lada lap ïa kino kino kiba wan rah ïa ka huri hura kaba ktah ïa ka shongsuk shongsain ki paidbah bad ruh kaba ktah ïa kane ka jingjied nongmihkhmat, kin sa shah pynshitom katkum ki kyndon jong ka aiñ.
Na ka liang une u heh ophisar ka District u la pynshlur ruh ia baroh ki nongthep vote ba ki dei ban leit thep vote ban jied iala ki nongmihkhmat haba ong ba kawei ka vote ruh kan nym dei ban shah ktah bad baroh ki dei ban ioh ïa la ka hok thep vote kumba la pynkup bor da ka riti synshar ka ri.
