Tura, Lber 05 : Ki bor District ka West Garo Hills, East Garo Hills bad North Garo Hills, kila pynmih ia ka jingpynbna paidbah ba pyntip ia ka jingpynjur ia ka jingpahara bad ki jingpynbeit ba kongsan na ka bynta ka jingrakhe dap phra snem ka Sorkar MDA bala ai kyrteng -“Our Magnificient Meghalaya-Vision 2032 : Celebrating 8 years of MDA Government”, ka ban long ha ka sngi Thohdieng ha PA Sangma Sports Complex, Tura.
Ki bor District ki pyntip ba ki bor synshar ha ryngkat bad ki Pulit bad ki tnad ba don bynta, kila pynkhreh bha nadong hadong ban pynthikna ia ka jingshngain ka leit ka wan bad jingiashimbynta ki nongioh jingmyntoi, ki nongshah khot sngewbha bad kumjuh ruh ki paidbah kiba wan iashimbynta.
“Ngi la buh bun ki bor pahara bad ki Executive Magistrate naduh ka por mynstep ban pynthikna ia ka jingiaid beit iaid ryntih ka leit ka wan ki nongiashimbynta” ong ki jingpynbna.
Ki bor District kila pynthikna ruh ba lah shim ia baroh ki lad jingiada ba kongsan ban tehlakam ia ka shongsuk shongsain bad ban pynthikna ia ka jingshngain ki nongwan iashimbynta baroh.
La kyntu ia ki nongshongshnong, ki nongioh jingmyntoi bad ki kynhun bapher bapher ba kin leit sha kane ka jingialang khlem kano kano ka jingsngew sheptieng bad ai ryh ia ka jingiatreilang ba kan long kaba jop.
Ki bor district kila maham pat ba kino kino kiba pyrshang ban pynthut ia ka suk ka sain lane pynthut ia kane ka jingialang, kin ngat ha ki jingpynshitom ba tyngeh kat kum ki kyndon ain.
