Shillong, Nailur 21: U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar kala pynkhlain mynta ia ki bor pahara ha khappud ka Jylla bad Assam hadien ka khubor ba mih ka kynhun kaikhlaw ba thymmai ki Karbi bala tip kumka United People’s Front of Karbi Longri (UPFKL).
Haba jubab ia ka call attention bala wanrah da u MLA ka UDP na Mookaiaw Bah Nujorki Sungoh, u Conrad ula ong ba watla ki khubor kila wan hynrei kam pat shym la don ka jingtip ba thikna lane ka jingujor da kino kino ki briew ba kila ioh pdiang ia ki shithi dawa pisa (bala ai da ka UPKFL).
“(Hynrei), haba pynshong nongrim na ki kot khubor (ba mih ka kynhun kaikhlaw thymmai), ngi la pyn bun ia ki Pulit ha ki jaka khappud” ula ong.
Ula iathuh baka shithi kala wan ruh sha ka Sorkar na ka Jaintia Students Movement (JSM) halor kane ka kam bad dei halor kane ba ka Sorkar kala shimkhia bad ki Pulit lem bad ki bor District kila trei khlem shongthait ban pynthikna ba ka jingshongsuk kan don ha ki jaka khappud.
U Conrad ula ong ba ka jingsngewkhia bala pynpaw da u Dkhot ka dei kaba kongsan. Ka histori jong ka Block-I bad Block-II ka dei kaba la iatip da baroh ba ka jingpynkynriah ia ka Block-I bad Block-II ka dei tang namar ka jingsuk ha ka synshar khadar. Kane ka dei kaba don ha ka jingthoh ha ka Sorkar Meghalaya, ka Sorkar Assam bad ka Sorkar India.
“Haba buh ia baroh kine ha ka jingmut jingpyrkhat, ngi la sdang ban iakren bad ka Sorkar Assam lem bad ka Karbi Anglong Autonomous Council (KAAC). Ngan pynsangeh noh na ka jingiakren halor kane bad kumno ba ngin ia jam shakhmat. Ha ka sien ba nyngkong, ngim pat ju iohi ia kum kane ka jingshimkhia jong ka Sorkar Assam bad ka Sorkar Meghalaya ban iapynbeit ia ki kam iakajia pud” ula ong.
Haba pyntip ba ki artylli ki Jylla kin sa shong jingialang ha ka taiew ba nyngkong ne baar jong u Risaw ban iakren biang ia ka jingiakajia pud, u Myntri Rangbah ula ong “Kan don ka jingpynleit jingmut kyrpang ia ka Khanduli, Psiar, Block-I bad Block-II haba buh ha ka jingmut ia ki jingiakynad kiba mih ha kitei ki jaka”.
Halor ka jingkyrpad u Bah Nujorki ban shna ia ka surok na Khatkhasla bad Mojem, u Sangma ula ong “Nga la kren ia u Symbud Myntri Rangbah uba la pyntip ba ka Tnad PWD kala pynkhreh ia ka Detailed Project Report (DPR). Ka kam kala iaid. Hynrei lada don ki bynta jong ka surok kiba hap hapoh ki jaka iakajia pud, katto katne ki jingeh ki lah ban mih”.
Haba iadei bad ka jingkyrpad ban thaw ia ka Primary Health Centre ha Psiar bad Moolber, u Conrad ula ong ba kine ki jaka ki hap hapoh ka jaka ba iakajia hynrei ka Sorkar kan pynthikna ba ki paidbah kin nym mad jingeh.
Kat kum ka jingong jong u, wat ki Sorkar kiba rim kila pyrshang ban phaikhmat sha kane ka bynta ha kaban pynthikna ba ki kam pynroi pynpar kim dei ban shah pynsangeh.
Shuwa kane, u Bah Nujorki ula kynnoh ba ka jingthmu jong kane ka seng kaikhlaw ba thymmai ka long ban pyntieng pynsmiej ia ki paid Khasi-Pnar kiba sah ha Block-I kaba don ha khappud ka West Jaintia Hills bad West Karbi Anglong khamtam ha ka Elaka Labang-Nongphyllut bad Pangam Raliang.
.){kind=link}