SHILLONG,Jylliew: Ka Shillong City Congress Committee kaba kynthup ia hynniew tylli ki Constituency ka Nongbah Shillong, kala sdang ban pynkhih bad tynjuh ia ka Sorkar Jylla halor ka jingkyrduh kam jong ki samla bad ruh ka jingdheng kali ha Nongbah Shillong kaba ktah jur ia ki nongshongshnong ha baroh ki kam.
Ka Shillong Congress Committee kaba la shong jingialang ha ka 6 tarik Jylliew kala shim ia ka rai ba kan pynlong noh da ka rynsan iaphylliew jingmut bad ka jingiasyllok bad ki riew shemphang kiba don ka jingtbit halor ka kam dheng kali nalor ban ioh ruh ia ki jingai jingmut jong ki kiban long ki jubab kumno ban lah weng noh ia kane ka jingeh ha ka Jylla.
Haba iakren bad ki lad pathai khubor, u Working President ka Meghalaya Pradesh Congress Committee uba la shah jied ruh kum u Chairman ka Shillong City Committee Bah PN Syiem ula ong ba ka Committee kala sngewkhia ruh ia ka jingkyrduh kam kyrduh jam ki samla la ka dei ka kam sorkar ne kiwei kiwei ki lad iohkam kumka jingsengkam lajong bad kiwei kiwei.
“Ngi la rai ban pynlong da ki prokram ai jinghikai da kaba wanlam ia ki kynhun kiba tbit na kylleng ka Ri India ki ban ai jinghikai halor ki lad ioham iohjam bad ruh kumno ban seng kam la ka jong” ula ong.
U Bah PN Syiem ula pyntip ba kane ka jingialang kala iatai ruh ia kawei ka mat ba kongsan bha bad kata ka long ban pynkhlain ia ka Party sha ka elekshon MLA ban long ha u snem ban wan.
Nalor kane, u pyntip ba ka jingialang kala rai ruh ban pan ia ki kaiphid treikam na baroh ki Block Congress Committee kiba hap hapoh ka Shillong City khnang ba ka Committee kan ioh ban buddien bad ban pynkhreh ia ka elekshon ha kine ki Constituency.
