Shillong, Jymmang 13 : Ki Nongialam jong ka Kynhun Garo National Liberation Army (GNLA) kynthup ia kiba shah kem bad ba wan pyndem wait, kila sdang ban pynkhie im biang ia ka Kynhun (GNLA) bad kila phah mynta ia palat 500 ngut ki samla na kylleng ka Ri-lum Garo ban leit hikai pyntbit sha Nagaland bad sha Burma.
Ka Kynhun GNLA ka dei ka kynhun kaba la pynkha da u Heh Pulit Meghalaya Police Service (MPS) uba la kylla riew sain pyrthei Champion R Sangma bad u Commander in-Chief bala kyllon iap u Sohan D Shira.
Kat kum ka khubor ba iajan bad ka Tnad Pulit la iathuh ba ki ehrang ka GNLA kiba la kynjah jar jar la bun snem mynta, kila sdang ban ialum biang ban pynkhie im ia ka GNLA, kaba la iap hadien ka jingkyllon iap u C-in-C bad jingwan pyndem bun ngut ki Dkhot.
Ki Pulit ki iathuh ba na ka jingioh lum khubor na ki dkhot ba pyndem wait ka GNLA, la pyntip ba ka GNLA kala sdang ban ialum briew biang ban pynim ialade bad kala pynlong ia ki jingialang ha kylleng ki jaka ka Ri-lum Garo ban pynrung dkhot ia ki samla.
La iathuh ba kane ka Kynhun kala pynlong ia ka jingialang kum ha Jadi, Nongal, Chalang, bad kiwei kiwei ban khring ia ki samla ba kin wan pyniasoh sha ka kynhun.
La iathuh ba kat kum ka jingioh lum khubor, kila don palat 500 ngut ki samla kila rung dkhot ha ka GNLA bad la phah ia ki mynta sha Nagaland bad Burma ba kin pyndep ia ki jinghikai pyntbit ha ka kiengatiar.
Ha kajuh ka por, ka khubor ka iathuh ruh ba ki don ki Heh Spah/Nongkhaii ba paw, kila don jingiadei ba iajan bad ka GNLA bad kila bei pisa ban pynkhie im ia ka kynhun.
Halor kane ka khubor, ka Tnad Pulit kala bthah ia ki Heh Pulit ka Ri-lum Garo ba kin peitngor bad buddien ia ka iaid ka ieng, ka trei ka ktah jong ki Dkhot ka GNLA bala pyndem wait kynthup kiba shah kem, ban wad ia ki nongkyrshan bad ki nongiarap, ki nongbei tyngka hala ki jong ki jong ki jaka.
La bthah ruh ban pynlong ia ki jingkhynra, jingiaid pahara da ki kali bad kjat man ka por ha ki jaka bala tip ba ki dei ki jaka rieh jong ka GNLA ban khanglad ia ki kam pyntriem jong kane ka kynhun ha Ri-lum Garo.
