Shillong, Nailur 29: Ka Trinamool Congress mynta kala pyniar ia ka shnat treikam jong ka sa ha Mawlai ban pynkhreh na ka bynta ka elekhson MLA kaban long ha u snem ban wan.
Katkum ka kyrwoh ba la phah da u Bah LR Dkhar, President laong ba ia katei ka rai la ia shim ha ka jingïakynduh lang jong ki riew rangbah, ki longkmie bad ki samla jong ka Mawlai Constituency kaba long dang shen ki la shim ïa ka rai ban pynïasoh ïa lade bad ka seng All India Trinamool Congress.
La iathuh ba ha ka jingialang ki la pynpaw ka jingbynniaw halor ka jinglong jingman ha ka saiñ pyrthei ha kane ka jylla Meghalaya la ka long ha ka synshar khadar, ka jingpynbeit pud pynbeit sam bad ka Assam bad ruh kiwei kiwei ki ishu kiba ktah ia ki paidbah nongshong shnong.
Nalor kata ka jingïalang ka pynpaw ruh ka jingsngewkhia kaba jur ha kaba ïadei bad ka jinghiar arsut ha ka liang ka ïoh ka kot hapdeng ki paidbah nongshong shnong ka jylla, ka jingbym ïoh kam ïoh jam jong ki khun samla, ka jingroi sted ki kam sniew khamtam ha kaba ïadei bad ka jingshah ktah jong ki khun samla ha u drok, ka jingkiew dor ki marbam mardih kaba la ktah jur ïa kiba bun ki longïing kiba duna ha ka liang ka ïoh ka kot nalor kiba bun kiwei pat ki jingeh.
Ki nongkitkam jong ka Trinamool Congress Mawlai Block ba la jied ha katei ka sngi ki kynthup ïa u President Bah LR Dkhar, Vice President, Wiskupar Sawkmie, General Secretary Akher K.Nongpiur, kynthup ïa ki 13 ngut ki joint secretary bad 20 ngut ki dkhot.ïa kine ki nongkitkam la pynskhem da u Vice President ka Meghalaya Pradesh Trinamool Congress Committee, u Bah James S.Lyngdoh.
