Pynsangeh ia Tnad Wilflife ia ka rai ban siat iap ia ki hati
Shillong, Nailur 29 : Ki Hati khlaw kiba don kumba 20 tylli eiei, kila pynjulor naphang ia ki jingthung jingtep bad ki iingrep jong ki paid Nongrep, kiba don ha kylleng ki bri rep jong ka thain Ranikor-kaba la shu pynjaw ummat kthang ia ki nongrep kiba la sngew kutlad namar ka jingbym phaikhmat lem ka Sorkar.
Kat kum ka jingiathuh ka seng ki Nongrep ka thain Ranikor- ka Ranikor Area Farmers Association (RAFA), kine ki Hati khlaw kila wan ban pynjulor ia ki marrep bad ki iing bri ha ka miet 28 tarik Nailur, 2024.
U President Bah Micheal Lyngdoh bad Secretary Kyrmen K Ryja, ki pyntip ba kine ki hati kiba don ym duna ia ka 20 tylli eiei, kila pynjulor naphang ia ki jingthung jingtep naduh ki diengkwai, ki sohtrun, ki dieng kait bad kiwei kiwei.
Ki pyntip ba kane ka jingwan pynjulor ki hati khlaw ia ki jaka rep ka dei kaba la jia naduh ki snem kiba la leit hynrei haduh mynta, ki bor Sorkar kim pat shym la leh eiei ban iarap ia ki paid nongrep. Ki pyntip ba ka seng kala dep ban leit ujor sha ki bor khmih ka Wildlife bad ka Ophis u Deputy Commissioner ka South West Khasi Hills hynrei kane ruh kala shu kut tang ha ka jingkular khlem phoida eiei.
Ka RAFA ka pyntip ba ka Tnad Wildlife kala wan jngoh la bunsien ia ki jaka rep ba pynjulor ki hati bad kila kula ruh ban ai jingiarap hynrei haduh mynta kam shym la seisoh satia.
Kine ki Nongialam ka RAFA ki iathuh ba ki paid nongrep kila bynniaw jur ia ka jingmynthi ki bor Sorkar bad ong “Ha u snem ba la lah, ka RAFA kala pynlong da ka jingialang paidbah bad shim ia ka rai ban shu siap iap noh ia ki hati hynrei tang shisngi arsngi, ka Tnad Wildlife kala wan kyrpad ban nym shim ia kane ka sienjam haba kular ban shimkhia hi da ka tnad kaba khlem myntoi eiei haduh mynta”.
Ha kajuh ka por, kane ka Seng kala pynpaw ia ka jingsngewsih ia ka jingkren u Myntri Rangbah ka Jylla ha Iingdorbar Thaw Ain haba u MLA ka Ranikor ula kren ia ka jingeh ki nongrep, da kaba ong ba ki briew bad ki mrad ki dei ban iasahlang.
“Ngi khot ia u Myntri Rangbah ban sngewbha wan dalade ban sah lang bad ki hati khlaw khnang ba un sngewthuh ia ki jingeh ki nongrep” kila ong.
Kane ka seng kala byrngem ba lada ka Sorkar bad ka Tnad Wildlife kim leh eiei noh halor ki jingeh ki nongrep, ka seng kam banse ban lum biang ia ki paid nongrep bad shim biang ia ki rai kiba kham tyngeh.
