Shillong Jylliew 21: U National President ka NPP bad Myntri Rangbah ka jylla Conrad Sangma hynne ka sngi Balang, ula pynngai ialade na ka kynrum kynram ka saiñ pyrthei ha Khasi Hills Autonomous District Council haba pynpaw b aka Sorkar kam kwah ba tuklar ia kaei kaba jia ha ki District Council.
U Conrad ula ong ba ki kam saiñ pyrthei ha ka District Council ka iapher na ka kam saiñ pyrthei haka sorkar jylla bad barabor hi ka sorkar jylla kam ju tuklar ia ki kam politik kiba jia ha kino kino ki District Council.
“Ki kam kiba iadei bad District Council kidei ki kam pohïing bad kumya ka sorkar jylla kam ju tuklar ia kino kino ki kam politik ha kino kino ki District Council la kadei ha Khasi, Jaintia ne Garo Hills Autonomous District Council,” ong u Conrad Sangma.
“Kumta kadei ka jaka treikam kaba laitluid ne ka Autonomous Body, kadei da kawei pat ka sorkar bad wat ha ka kam saiñ pyrthei ruh ka don iala ka jong ka bynta bad ki kam pohiing ruh kila long kiba bun ki jnit ki jnat kumta ngi iai pynneh beit iala ka jong ka lynnong bad ki kamram bad ngim ju tuklar lut iaka jinglong jingman baroh” ong u Myntri Rangbah.
Lah ban kdew ba ka jingshah pynkhyllem ka Executive Committee (EC) ha KHADC kaba ialam da ka UDP, kadei lyngba ka No Confidence Motion kaba la wanrah da ka NPP ha ryngkat ka jingiatreilang bad ka seng Congress bad kane ka kynhun kalajied ruh ia u Bah Pyniaid Sing Syiem kum u Chief Executive Member (CEM) bathymmai jong ka Council.
“Kadei ka kam pohiing bad ka kam ka bym don jingiadei bad ka sorkar bad ngim ju tuklar ia ka rukom treikam kaba man la ka sngi jong ki District Council,” la ong u Conrad.
Haba kylli halor ka jingsngewsih jong u President ka UDP ba kam shym la long kaba iaid beit iaid ryntih, na ka liang u Conrad ula ong, “Ka long kaei kaei kaba ym shim la don ban poi pyrkhat ban jia, Ngi kham kwah ban pynbeit ia katei ka kam ha ka lynti kaba dei hynrei kila don ki jyrwit jyrwat bad nga tharai kala donkam ia ki ba kin leh eiei noh”.
“Hooid ki don ki jingeh bad ki jyrwit jyrwat kumba nga la ong hynrei ngim ju tuklar ia karukom treikam kaba man la ka sngi. Ki don bun kiei kiei ia kaba ym lah ban tiplut ia kita ki jyrwit jyrwat bad kiei ki kam politik kiba iaid hapoh bad kidon ruh ki jingjia ki bapher kiba mad man la ka sngi hapdeng ki MDC bapher bad ka Executive committee (EC) kumta kine ki jingtynjuh kin don beit bad kan shong ha u Chief Executive Member kumno ba yn shimkhia” ong u Conrad Sangma.
