Shillong, Nohprah 04: U Lamphang ka ïingdorbar thawain ka jylla u Thomas A. Sangma, hynne ka sngi Balang ula lum ia ka jingialang jongka High-Power Committee (HPC) ban khmih bniah ia ka jingiaid ki kam ha ka jingtei ia ka ïingdorbar thawain bathymmai ka jylla ha Mawdiangdiang.
Ha kane ka jingialang la wan ban iashimbynta da u Myntri Rangbah ka jylla u Conrad K. Sangma, u Deputy Speaker ka ïingdorbar thawaiñ u Timothy D. Shira, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, ki MLA kiba kynthup ia u Bah Charles Pyngrope, Bah Lahkmen Rymbui bad u Bah Banteidor Lyngdoh, u Chief Secretary ka jylla u Bah D.P. Wahlang, u Commissioner and Secretary ka Assembly u Dr. Andrew Simons bad kiwei kiwei ki heh ophisar sorkar.
Hadien katei ka jingialang, u Thomas A. Sangma ula pyntip ba ka jingbuh thong ban pyndep ia kaïingdorbar kaba thymmai la pynjlan biang da ka jingthmu ban ioh ban plie noh ia ka shwa ban pynlong ia ka Dorbar Synrai ha u snem ban wan. Ka jingslem kadei namar ba ka don ka jingkyllain bad ka jinglong kyrpang ha ka rukom pynwandur ia ka Dome ia kaba donkam ban leh da ka jingphikir bha ia ka kam.
“Ka jingialang jongka High-Power Committee hynne ka long kaba biang bha. Da ka jingsngewkhia, ngi lah ia shim ia ki katto katne ki rai. Ka jingiaid ki kam ki jam haduh mynta ka long kaba sngewhun hynrei ngi la iaid suki bad phikir bha namar ka jingtei kaba long kyrpang ia ka Dome ha ka Main Hall. Kam don kano kano ka jingpynwan dur kaba iasyriem kumjuh ha ki bynta jong kane ka ri. Ngim lah ban leh kyrkieh bad ban mih biang ka jingjia sa shisien” la ong u Lamphang ka ïingdorbar.
Ula bynrap da kaba ong “U Structural Engineer ula don ha katei ka jaka ban pynthikna ba ka jingtrei ia ka kam ka long kaba biang bad kaba bha. Ngi kyrmen skhem ban ioh pynlong ia ka Dorbar Mang Tyngka hangne, hynrei ngi sngewsih pat ba katei ka kam ka dang sahteng bad kam ailad ia ngi ban ioh ban iaid shakhmat. Ngi don ia ka jingthmu ba ia kane ka projek yn pyndep bad yn plie hashwa jong ka Dorbar Synrai jong u snem 2025”.
U Conrad K. Sangma ula pynpaw ia ka jingdonkam ban don ia ka rukom treikam kaba la pynkhreh bha, da kaba phaikhmat sha ka jingjia kaba la jia ha ka por ba dang tei.
“Ki kam kila iaid bha shakhmat hynrei ngi hap ban mad ia ki jingtynjuh. Ki Engineer na ka Public Works Department (PWD), Project Management Consultant (PMC) bad ki Contractor kila pynlong bunsien ia ka jingkhmih bniah halor ki jingtip baroh. Ka HPC kala mynjur ban pynjlan sa 100 sngi bad kane kala buh ha ka jingeh ban pynlong ia ka Dorbar Mang Tyngka kumba la buh jingthmu mynshwa. Hynrei ngi don ia ka jingskhem jingmut ba ia kane ka projek yn pyndep shwa ka Dorbar Synrai jong u snem 2025” ula ong.
Haba pynpaw ia ki jingeh na ka jingpynwandur bad ia ki tiar ki tar kiban pyndonkam ha kaban tei ia ka Dome, u Myntri Rangbah ula batai da kaba ong, “Ka jingpynwandur ia ka Dome kaba la dep la pynsangeh noh kaba don ruh ia ka jingkhia kaba 3,000 Metric Ton. Mynta da ka jingpynwan dur thymmai ha ka jaka ban pynieng ia ka Dome kaba kynthup ia ka jingpynieng ia ki paia da kaba pynduna noh ia ka jingkhia jong ka Dome sha ka 85 Metric Ton. Kane ka jingpynkylla kan pynthikna ia ka jingskhem bad kan long ruh ka jingshim ia ki lad jingshngain na ka jingkyiuh u jumai, ka jingtuid ka um slap bad ki jingsngewkhia ha kaban pynneh bad maramot kiba bun snem”.
Ka jingtei ia ka ïingdorbar thawaiñ kaba thymmai ka long da ka jingthmu ban long kum ka jaka kaba pawnam bad la pynwan dur ha kata ka rukom ba kan long ka jaka kaba bit ba biang bad kaba heh na ka bynta ki nongmihkhmat, ki nongtrei bad ki seng saiñ pyrthei.
 ban khmih bniah ia ka jingiaid ki kam ha ka jingtei ia ka ïingdorbar thawain bathymmai ka jylla ha Mawdiangdiang.){kind=link}