Shillong, Nailar 30 : Ka Sorkar Jylla kala pynbna ban pynjlan biang sa hynriew bnai ia ka elekshon MDC sha ka Iingdorbar jong ka Khasi Hills Autonomous District Council (KHADC) bad Jaintia Hills Autonomous District Council (JHADC) ka ban sdang treikam naduh ka 5 tarik Nailur 2024.
Kat kum ka jingpynbna jong u Secretary ka Sorkar Jylla ba khmih ia ka Tnad District Council Affairs (DCA) Bah CVD Diengdoh, la ong ba kane ka jingpynjlan ka dei namar ba ka dang iaid ka jingpynbeit thymmai ia u pud u sam jong ki Constituency (delimitation) ha kine ki artylli ki Autonomous District Council (ADC).
Ka jingpynbna bala pynmih hynne ka sngi Thohdieng ka ong “Namar ka jingpynbeit thymmai ia u pud u sam jong ki constituency ha KHADC bad JHADC kala poi artad sha kaban jan dep, bad namar, kumba la pruid dak ha ka sub para graph (6A) jong ka Sixth Schedule ka Riti Synshar ka Ri, u Lat ka Jylla u sngewhun ba ka daw kaba mih ha kaban pynlong ia ka elekshon sha ka KHADC bad JHADC ka dei ka bym ban leh mynta”.
“Namar, donkam ia ka por ban pynkhreh ia ka jingpynlong ia ka elekshon sha ka Iingdorbar ka KHADC bad JHADC” kala bynrap.
Kumta, halor ka bor bala pynkup da ka proviso jong ka sub-paragraph (6A) jong ka paragraph 2 jong ka Riti Synshar ka Ri India, pule lang bad ka proviso ka sub rule (1) of rule 7 ka Assam and Meghalaya Autonomous District (Constitution of District Council Rules, 1951 kumba la pynkylla, u Lat u sngewbha ban pynjlan ia ka samoi treikam jong ka KHADC bad JHADC bad ki dkhot haduh 6 bnai naduh ka 5 tarik Nailur 2024 khnang ban lah pynlong ia ka elekshon ka KHADC bad JHADC hapoh kane ka por.
 bad Jaintia Hills Autonomous District Council (JHADC) ka ban sdang treikam naduh ka 5 tarik Nailur 2024.){kind=link}