Imphal, Jylliew 15: Ka Sorkar Manipur ha ka sien kaba khyndai, kala pynjlan biang ia ka hukum khang internet kat haduh ka 20 tarik u Jylliew, 2023 namar ka jingiai bteng ki kam iaumsnam hapoh ka Jylla na ka thma iapher Jaidbynriew.
Ka jingthmu jong kane ka jingpynjlan ka long ban khanglad ia ka jingsphriang ki khubor hamsaia, ki video, ki dur bad ki jingiaphah khubor, kiba lah ban nang pynsniew shuh shuh ia ka jinglong jingman ka suk ka sain ha ka thain.
Ha ka hukum, u Commissioner ka Tnad kam Pohiing ka Manipur T Ranjit Singh ula ong ba kane ka sienjam ka dei kaba kongsan ba hap ban shim khnang ban lah tehlakam ia ki kynhun kaikhlaw, ban tehlakam ia ka jingsuk, ka jingiakynad bad ban iada ruh ia ki nongkynti jong ki riew shimet bad kumjuh ruh jong ka Sorkar nalor ka jingduh noh ki mynsiem briew.
Ka Manipur Human Rights Commission (MHRC) dang shen kala kyrpad ia ka Sorkar Jylla ba kan pyllait noh ia ka jingtreikam ka kor Internet, kaba la khang naduh ba mih ka thma iakynad jaidbynriew ha ka 3 tarik Jymmang.
