Shillong, K’lyngkot 18 : U Deputy Commissioner ka East Khasi Hills, SC Sadhu, hynne ka sngi Balang, ula pynjari ia ka kyndon 144 CrPC hapoh ka District ban pyntreikam thikna ia ki kyndon jong ka Model Code of Conduct (MCC) ka Election Commission of India (ECI).
Kat kum ki hukum, u Deputy Commissioner ula khang ia ki Political Party ne ki kyrtong ba kin thoh jingthoh ha ki kynroh, wah poster, pynieng banner bad kiwei kiwei ki kynja jingpynbna ha ki surok, lynti iaid bad ha kino kino ki jaka shimet , ki kynroh khlem da ioh jingbit na ki trai iing bad kumjuh ruh na ka Ophis.
La pyrkhing ruh ba ym dei ban pynlong ia kino kino ki jingialang elekshon khlem da ioh jingbit na ka Ophis bad na ki Dorbar Shnong ba iadei bad ki jaka ba thmu pynlong. La khang ruh ia ka jingpyndonkam kor pynsawa hapdeng ka 10 baje mynmiet haduh 6 baje mynstep bad ban pynlong ia ki rally khlem da ioh jingbit.
Nalor kane, ula pynmih ruh ia ka hukum ba khang ia ka jingrah pisa palat T.50000 hapoh ka District namar ka jingsngew jong ka ECI ba kin don ki briew kiba rah bun ka pisa kaba lah ban pyndonkam ha kaba thied ia ki nongthep vote. Kane ka dei kaba la leh khnang ban lah wanrah ia ka elekshon kaba khuid bad ba iaid beit iaid ryntih.
Kumjuh ruh, ula hukum ia ki briew kiba don ia ki tiar siat kiba la ioh licence ba kin wan aiti noh ia ki tiar siat jong ki sha ki Police Station kiba jan katba ka MCC ka dang treikam.
Ula ong ba ki briew kiba pynkhein ia kane ka hukum ki lah ban ngat ha ka jingpynsaja da kaba pynshong along ym duna ia ka shisnem bad kaba lah ruh ban pynkiew sha ka 3 snem nalor ki kuna.
