Tura, Lber 10 : Ki bor district ka West Garo Hills kila pynjari da ka korphiw ba 24 kynta ha baroh kawei ka district ban tem ia ka jingiakynad kaba mih na ka jingshah khang ki bar Jylla ban thep kyrteng kum ki kyrtong ha ka elekshon GHADC.
Ia kane ka hukum la pynmih da u Vibhor Aggarwal, District Magistrate ka West Garo Hills ha ka sngi Ba-ar hapoh ka kyndon 163 jong ka Bharatiya Nagarik Suraksha Sanhita (BNSS), 2023, kaba long ruh hadien ki khubor ba lah ban mih ka huri hura kaba jur, kaba lah ban buh jingma ia ka jingim ki briew bad ki nongkynti ha ka district.
Kat kum ka hukum, ka korphiw kan treikam naduh ka por 12 baje mynstep jong ka 10 tarik haduh ka 12 baje mynstep jong ka 11 tarik Lber.
Hapdeng kane ka por, yn ym shah ia kino kino ki briew ba kin mih shabar nala ki iing ki sem hapoh u pud u sam ka WGHD.
Hynrei, ka korphiw kala pynlait tang ia ki Pulit bad ki bor pahara ba don ha ka kam, ki magistrate bad ki nongtrei sorkar kiba don ha ka kam, ki nongtrei ka koit ka khiah, ambulance bad ki emergency service bad ruh ki briew ki ba don bynta ha ki kam ki bym lah ban kiar kat kum ba la pynbna da ki bor district.
La bthah ia ki bor district bad ki Pulit ba kin pyntreikam pyrrkhing bha ia kane ka hukum pynjari korphiw.
Ki bor district ki mahak ruh ba kano kano ka jingpynkhein ia ka hukum kan khring ia ki jingpynshitom kat kum ka kyndon 223 jong ka Bharatiya Nyaya Sanhita bad kiwei ki ain kiba lah ban pyntreikam.
