Shillong Feb 7: Ka bor pyniaid district ka East Jaintia Hills district kala pynjari ia ka kyndon 163 jong ka Bharatiya Nagarik Suraksha Sanhita (BNSS) ba mana pyrshah ban ialum briew palat ia ka 5 ngut hajan ka jaka ba suba jur ba tih dewiong be-ain ha ka shnong Thangsko.
Ia kane ka hukum la pynmih hadien ba kala don ka jingbthei ha ka par tih dewiong be-ain kaba la lam sha ka jingkhlad noh jong ki 27 ngut ki briew haduh mynta.
Ia kane ka hukum la pynmih ha ka sngi saitjain da u District Magistrate u Manish Kumar bad ka ong, ba kane ka jingleh kadei da kaba bud ia ka hukum kaba la pynmih da ka Meghalaya High Court ha ka 5 tarik u Rymphang, kaba la shim ia ka Judicial Notice jong ka jingbthei ha ki 3 tylli ki par tih dewiong be-ain bad la bthah ia ki bor kiba dei khmih ba kin sdang mardor bad ban leh da kaba tyngeh pyrshah ia kito kiba donkti ha katei ka kam tih be-ain.
Da kaba ai ia ki jingujor kiba biang na ki nongshong shnong bad ki kaiphod ha ki social media halor ka jingbteng jong ka jingtih dewiong be-ain ha ka thain Thangsko, u District Magistrate ula pynpaw ba ka lah ban don ka jingbitar ha ka jingpyntreikam ia ki jingkhynra kynthup ia ka jingpynduh pyndam noh ia ki jaka riehtngen kiba shipor, ka jingkhang dam ia ki jaka tih bad ka jingkurup ia ki tiar ki tar bad ia ki kor ki bor.
Hapoh jong katei ka hukum, kano kano ka jingialum kaba palat ia ka 5 ngut ha kino kino ki bynta jong ki jaka tih dewiong be-ain kadei kaba la mana pyrshah bad kaban treikam noh mardor, lait noh tang ia ki ophisar sorkar kiba pyndep ia ki kamram ba shongain ki jongki.
Ki bor pyniaid district kila bthah ia ki majistor bad ia ki pulit ban pynlong ia ka jingjurip kaba bniah bad ba pyrkhing bha ha kylleng jong ka Thangsko, ban kurup ia ki kali, ki mashin bad ia ki tiar ki tar kiba la pyndonkam ha ka kam tih be-ain bad ban shim ia ki sienjam da kaba iaid hapoh jong ka Mines and Minerals (Development and Regulation) Act bad kiwei kiwei ki kyndon ain, ban ithuh, bat bad kem ia ki trai par, ki nongpyniaid, ki nongbei tyngka bad kiwei kiwei kiba donkti bad ban lum ia kiei kiei kiba don ka jingiasoh lang bad kitei ki kam.
Ia kane ka hukum la pynmih namar ka jingdonkam kyrkieh ka kam bad kan iai bteng ban treikam tad haduh ban da pynmih da kawei pat ka hukum.
Ki bor kiba dei khmih kila maham ba kano kano ka jingpynkhein kan khring ban shah pynshitom tyngeh ha ki kyndon jong ki ain bapher bapher.
 ba mana pyrshah ban ialum briew palat ia ka 5 ngut hajan ka jaka ba suba jur ba tih dewiong be-ain ha ka shnong Thangsko.){kind=link}