Nongstoin, Rymphang 08 : U Superintendent of Police ka West Khasi Hills Bah Herbert P Kharkongor, ula maham ban leh da kaba tyngeh kat kum ki kyndon ain bad ban nym map satia iano iano ruh kiba pyrshang ban pynthut ia ka suk ka sain ha ka imlang sahlang hapoh ka District.
Kane ka jingmaham kala mih hadien katto katne sngi ba saphriang ka video ha ki rynsan social media, kaba pyni ia ki kynhun ki samla kiba iashoh iadat hapdeng surok ha Nonbah, Nongstoin. Kane kala jia ha ka miet shiteng synnia jong ka 24 tarik Kyllalyngkot, 2026.
U SP ula pyntip ba ki Pulit ka WKH kila register da ka suo motu case halor katei ka jingjia ha Nongstoin Sadar Police Station bad ka jingtohkit mynta ka dang iaid shakhmat.
“Ngi la dep ban ithuh ia baroh kiba donkti ban iashoh iadat bad ia uba mynsaw jur ha katei ka jingjia bad ngi lah leh ia kaba donkam kat kum ka ain” ula ong.
Une u Heh Pulit ula kyntu ia ki paidbah ba lada lap ba don kino kino kiba pyrshang thaw jingkulmar ne pynthut ia ka suk ka sain ka imlang sahlang, ba kin ai jingtip mar mar sha ki Pulit lyngba ka Police Control Room No. 9366498499 bad Helpline No. 112. Nalor nangta, ki paidbah nongshong shnong ki lah ban leit ai jingtip mar mar sha ki Police Station bad ki Out Post kiba jan tam
