Shillong, Rymphang 21 : Ki bor District ka East Jaintia Hills kila pynjari da ka kyndon 163 BNSS ba mana ban lum briew palat ia 5 ngut ha ka shnong Wapungskur bad Bataw lait noh ha ki Polling Station ban don ka jingthep vote da kawei.
Kane kala mih hadien ba ka Tnad District Council Affairs (DCA) kala hukum ban thep vote da kawei ha ki saw tylli ki polling station ka Musniang-Rangad constituency bad Bataw-Lakadong constituency, namar ka jingshah thombor bad shah pynjulor ki Electronic Voting Machine (EVM) ha ki paidbhur hynne ka sngi thep vote.
Ia kane ka hukum la pynmih da u District Magistrate Shivansh Awasthi kaba mana ruh ban rah tiar lane tiar pynmynmaw ha ka shnong Wapungskur bad Bataw, lait noh ki bor pahara bad kano kano ka kam jong uno uno u briew lane kynhun kaba pynthut ia ka jingiaid briew lane ka kam ba pynthut ia ka suk ka sain bad ka jingsuk.
Ka jingiathep vote da kawei ha ki saw tylli ki polling station-Wapungskur A bad Wapungskur B hapoh ka Musniang-Rangad constituency bad ka Bataw A bad Bataw B hapoh ka Bataw-Lakadong constituency, kan long lashai ka sngi saitjain naduh ka por 7 baje mynstep haduh 4 baje janmiet.
