Shillong, Nailar 31 : Ka District Magistrate ka East Khasi Hills kala pynjari ia ka kyndon 144 CrPC hapoh bad marjan ka Secretariat Hill ha ka sngi Palei tad haduh da pynbna da kumwei pat.
Ia kane ka kyndon la pynjari halor ka jingioh khubor ba ka lah ban don ka jingiakhih jong ki kynhun sengbhalang kaba lah ban ktah ia ka shongsuk shongsain.
“La ioh jingtip ba kin don ki sengbhalang ki ban pynlong ia ki jingiakhih ha kylleng ki jaka jong ka District bad la sngew ba lada shah ia kum kine ki jingiakhih ha ka “No Procession or Assembly Zone” ka lah ban pynthut, ktah ia ka iaid ka iaid ki kali, lam sha ka jingialum paidbah bad jingkhapngiap bad lah ruh ban lah sha ka jingpynthut sha ki jaka paidbah” ong ka jingpynbna.
La pyntip ruh ba kine ki kynhun ba thmu iakhih/iaid paidbah kim shym la ai jingtip lane kim shym la ioh ia kano kano ka jing mynjur na ki bor ba dei khmih.
Kane ka jingpynbna ka khang ia kano kano ka kynhun ne ki briew ban pynlong ia ki jingiashongkyllain mungor ne rally hapoh ka 200 meter radius na ka Meghalaya Secretariat Building bad Raj Bhavan. La khang ruh ban rah ia kino kino ki tiar pynmynsaw ne kino kino ki tiar kiba lah ban pyndonkam kumki tiar ialeh kiba lah ban pynmynsaw ia ki briew.
Halor kane ka jingtip, ki bor Pulit ka East Khasi Hills kila pynjur bha ia ka jingpahara ha kylleng ki jaka jong ka Nongbah Shillong khamtam ha ki lynti ki ban rung sha Secretariat Hill.
