Nongstoiñ, Rymphang 25: U Deputy Commissioner ka West Khasi Hills, ula pynjari da ka kyndon 144 CrPC hapoh ka District, kaba maham ia ki briew ban thang ia ki khlaw ki btap bad ki lum phlang ha kane ka aiom ba jur ka lyer.
Kat kum kane ka hukum, u Deputy Commissioner ula ong ba ka dei ka jingmlien kaba sniew ban thang bad wiang ding ia ki lum bad ki khlaw ki btap bad ong ba kane ka ktah ia ka mariang,ki sawdong sawkun, ki mrad ki mreng, ki jingthaw kiba im bad ha kajuh ka por ka pynjakhlia ia ka lyer nalor ka jingma ia ka jingim ki briew bad ki nongkynti.
Ula ong ba la lap khah khah ba ki briew ki mlien bha ban wiang ding ia ki lum bad ki khlaw ki btap kiba don hapoh ka District khamtam ha ki thain Mawlangkhar, Mawpun, Nongkhnum bad kiwei kiwei.
U ong ba lada lap ia kino kino kiba ialeh pyrshah ia ka hukum, kin ngat ha ki jingpynshitom kat kum ki kyndon ain.
