Shillong, Naitung 11: Ka Deputy Commissioner ka East Khasi Hills Kong RM Kurbah ha ka sngi Ba-ar, kala ong ba ki nongshongshnong kiba jai jai ki dei ban rung iing noh hapoh ka 10 baje mynmiet ha ka jaka ba kin shang shane shatai hadien ka 10 baje namar kam long satia kaba shngain satia ha surok.
Kala pyntip ba ka jingpynjari ia ka kyndon 144 CrPC hapoh ka District kan treikam tad haduh ba ka mynsiem ban pyrkhat lang bad jinglong ba jai jai kan wanphai pat hapoh ka Nongbah.
Ka Deputy Commissioner kala kren ruh halor kiba bun ki daw ka jingbym shngain bad jingsngewkhia kaba lam sha ka jingpynjari ia kane ka kyndon.
Kane ka jingkynthoh ka DC kala mih tang shisngi hadien ba la hukum ban khang khyrdep lut ia baroh ki dukan ha Nongbah hapoh ka por 10 baje mynmiet.
Ha ka hukum ba ka pynmih ha ka sngi Nyngkong, ka Deputy Commissioner kala ong ba ia kane ka rai la shim namar ki kam iashoh iadat kiba jia ha kylleng ki jaka ka Nongbah, kaba lam sah ka jingpynthut ia ka suk ka sain khamtam ha ka por mynmiet.
Kala ong ba kum kine ki jingjia ki lah ban pynthut ia ka imlang sahlang, buh ka jingma ia ki nongleit nongwan ba man ka sngi bad buh jingma ruh ia ka jingim jong ki riew paidbah.
Ia kane ka hukum la pynmih da ka DC hadien ka jingkyrpad jong ka Dorbar Shnong Pyllun ka Laitumkhrah kaba la kyrpad ia ki bor District ban pynmih ia ka hukum ba dei ban khang noh ia ki dukan hapoh u pud u sam ka Laitumkhrah hapoh ka por 10 baje mynmiet.
Ha ka sngi Nyngkong, ka Dorbar Shnong kala buh ia kane ka jingkyrpad ha ka jingialang bad ka Deputy Commissioner ha ka jingiadonlang u Superintendent of Police Sylvester Nongtnger.
Pule lang ia kane: Kem ki Pulit ia u briew ba kam Lt Col ka Indian Army na Sikkim
