Shillong, Jymmang 26 : Uwei u lanot shah dawa pisa lyngba ka shithi dawa jong ka seng Hynniewtrep National Liberation Council (HNLC), ula pynithuh ia u Synshar Khymdeit ba u dei uwei na ki nonglum pisa jong ka HNLC.
“Bah, une u briew (Synshar Khymdeit) u dei u juh uba la wan dang shen ha Shillong Press Club ban kyntait ia ka jingdonkti jong u” ong une u lanot, ia uba la buhrieh noh ia ka kyrteng, ha ka shithi ba ula phah sha u President ka Shillong Press Club Bah DL Siangshai.
Kane ka shithi ka dei kaba la thoh naduh ka 17 tarik Iaiong 2025 bad ka dei kaba dang shu ioh pdiang dang shen.
Ha ka 1 tarik Nailar 2023, u Synshar Khymdeit ula kren sha ki lad pathai khubor ha Shillong Press Club ha kaba ula kyntait ia ka jingdonkti ban sam ia ki shithi dawa pisa sha ki nongkhaii ha ka kyrteng jong ka HNLC. Kane kala mih shisngi hadien b aka kyrteng jong u, kala paw ha kawei na ki kot khubor Khasi kaba iathuh shaphang kawei ka kynthei na Mawlai kaba la ioh pdiang ia ka shithi dawa pisa ba T.20 lak.
Shuwa kane, ka kyrteng u Synshar kala mih ruh ha ki shithi dawa pisa kum u Area Collector ka HNLC ha East Khasi bad Ri-Bhoi.
Une u lanot, uba dei u nongkhaii, ula iathuh ba nyngkong ula iohpdiang ia ka shithi dawa bala phah da arngut ki area collector ka HNLC-Wallamjingsuk Barim bad u Synshar Khymdeit-ha ka 28 tarik Kyllalyngkot 2022, ba dawa ia u ban siew ia ka pisa ba T.4.4 lak kum ka khajna.
Ula sor ia ka shithi dawa ba ong “Ko nongsiew khajna….. la pyntip ia phi ba ka tarik ba khatduh ban siew ia ka khajna ba shisien shisnem sha ka HNLC ka long ha ka 03/03/2022. Kum ka dukan ba dang thymmai, phi hap ban siew ia ka khajna ba tang T.4.4 lak…la bthah ia phi ban pynkhreh lypa ia ka pisa hapoh ka tarik bala buh ban kiar na kino kino ki jingjia…la pynkynmaw ruh ba lada phim iatreilang, ngim don lynti da kumwei pat hynrei ban shim ia kiwei pat ki sienjam ban pynioh ia ka posa…lada phi pyntip sha ki Pulit shaphang kane ka shithi, ngin sa buh da u bomb ha khyrdop jingkhang, phin sa duh lut ia ki bahaiing hasem bad baroh ki briew ba phi ieid…shaniah ha ngi, ngim kren kai..Hashuwa ban kut jong une u bnai, ngin sa pynbthei bomb ha Police Bazaar ban pynkynmaw ia ki briew kum ma phi ba phim don dei ban don hangne…..kumta, siew lane phin iap”.
Une u lanot ula phla ruh b aula siew ia kane ka jingdawa pisa namar ka jingsheptieng.
“Haba nyngkong, nga dang mut ba don kiba lehkai, hynrei haba la don shisha ka jingbthei bomb ha Police Bazaar ha ka 30 tarik Kyllalyngkot jong utei u snem, ngam don lynti shuh da kumwei hynrei ban pyndep ha ka jingdawa jong ki namar ka jingsheptieng ioh ki leh kumjuh ia ka dukan jong nga. Nga la pynkhreh ia ka pisa bad ha ka 3 tarik Lber, 2022, uwei ubriew ba kyrteng u Synshar Khymdeit ula wan bad lum ia ka pisa ha ka kyrteng ka HNLC” ula ong.
“Hadien shisnem thik, ha ka 3 tarik Lber 2023, une ujuh u briew ula wan biang sha dukan jong nga ban pan shuh shuh ia ka pisa da kaba ong ba lada ngam siew, “Ka HNLC kan pyniap ia baroh ki bahaiing hasem jong nga”. Ula ong ruh ba kin sa don ki jingpynbthei bomb ha kylleng ki jaka ka Nongbah Shillong kum ha Them Metor, Iewduh bad Mawbah ha u 2024.2026 bad 2028. Namar ka jingsheptieng ioh kane ka jingkren ka lah ban dei kaba shisha, nga la rai ban pyntip sha phi halor kine ki jingjia baroh” ong une u lanot.
Une u lanot u pyntip ba hadien ba ioh pdiang ia ka shithi dawa kaba ar, kila rai ban pynkynriah noh ia ka dukan sha kawei pat ka jaka bad ha kawei pat ka kyrteng.
“Ngi la kynriah ruh ia ka jaka sah sha ka iing ki kiaw/kthah…Nga marwei, nga sah sha kawei pat ka jaka ia mynta tad haduh ba ngan da ioh ia ka jaka kaba shngain ia nga bad ia ka iing ka sem baroh kawei” ula ong.
, ula pynithuh ia u Synshar Khymdeit ba u dei uwei na ki nonglum pisa jong ka HNLC.){kind=link}