Shillong Risaw 18: Ka Mylliem Govt Lower Primary School kaba dei ka skul kaba la seng naduh 1926, hynne ka sngi Thohdieng, kala ioh ia ka Iingskul kaba thymmai kaban pynmyntoi shibun ia ki khynnah skul ka thaiñ.
Ia kane ka skul la ithuh kum ka Govt LP school ha u snem 1994 hynrei mynta kala ioh ia ka iingskul kaba thymmai kaba la pynioh da u MLA barim ka Mylliem Bah Hamletson Dohling.
U dkhot barim duh jong ka Managing Committee ka skul Bah O Nongkhlaw ula pynpaw ka jingsngewkmen ba hadien 30 snem la ioh ia ka iing building kaba paka.
Ula ong kiwei kiwei ki nongmihkhmat ki lap miet sa tang ka buh maw nongrim hynrei u bah Hamletson Dohling u pyni da ki kam bad kala long ka jingkyrkhu kaba khraw ia ki nongpyniaid skul bad khamtam eh ia ki khynnah skul namar mynshwa tang shu slap la hap pynsangeh ia ka skul.
Haba ai jingkren, u Bah Hamlet ula ong, kum u nongmihkhmat barim ula trei shitom ban kyntiew ia ka pule puthi ha Mylliem constituency khamtam ban tei ia ki iing skul.
Ula ong ba ki don 7 tylli ki Govt LP school ha ka constituency bad ula lah ban pynioh iaka pisa na ka bynta baroh 7 tylli kitei ki skul, ha kaba 6 tylli ki LP school la dep ban tei bad plie hynrei kaba sah ka long tang ka 5 Mer Govt LP school ia kaba yn sa sdang noh shen ia ka kam.
Ula kyrkhu kyrdoh ia ki khynnah skul bad kyntu ia ki ba kidei ban lòng kiba minot bad trei shitom, kiba don akor burom ha ka jingim ka jong ki.
Ha katei ka jingialang la donlang u SDSEO bah JA Marwein, JRDO Mylliem Block Bah P Thawmuit, ki Rangbah Shnong, Nongialam shnong na Nongbet, Kyndong, Syllai u Lor bad na Madan ïing Syiem, ki nonghikai, ki khynnah skul bad kiwei kiwei.
