Shillong, Nohprah 19 : Hadien ka jingshah wiang ding ka Beat House ha Shnong Mukroh namar ka jingther kuli ki Pulit Assam ha kane ka Shnong kaba shim ia ka mynsiem ki 5 ngut ki Khasi myn ha ka 22 tarik Naiwieng, ka Sorkar Assam kala tei biang ia kane ka Beat House bad buh ia ki Nongtrei ha kane ka jaka.
Ka Khasi Students’ Union (KSU) lem bad ki Nongialam Shnong na Mukroh hynne ka sngi nyngkong kila wan ban iakynduh ia u Myntri Rangbah ka Jylla Conrad K Sangma ban pyntip ha u ia kane ka jinglong jingman bad kwah ruh ba un tuklar ha kaban weng noh ia kane ka Beat House ka Assam na ka thain namar kane ka jaka ka dei kaba dang hap ha Meghalaya.
U General Secretary ka KSU samla Donald Thabah ula ong b aka jingthmu jong kane ka jingwan iakynduh ka long ban buh ia ka jingkyrpad hakhmat ka Sorkar Jylla ba kan pynkohnguh ia ka Sorkar Assam ba kan weng noh ia kane ka Beat House na Mukroh.
“Ngi wan ban iakynduh ia u Myntri Rangbah ban pyntip ha u ia kane ka jingjia hynrei ngi khlem ioh iakynduh satia namar ba um da khlain” ong u samla Donald uba dei ban iakynduh ia u Myntri Rangbah ha Secretariat.
U samla Donald ula ong “Ngi la wan dang shen sha Mukroh bad lap ba ka Assam kala tei biang ia ka Beat House kaba kham bha shuh shuh ban ia kaba rim bad kila don ruh ki nongtrei ha kane ka jaka. Kane ka Beat House ka dei kaba don hapoh u pud u sam ka Mukroh. Ka Assam kala shu wan rung beain”.
