Shillong, Risaw 07: U Nongialam barim ka BJP bad MLA barim ka Mawphlang Bah J.A Lyngdoh, hynne ka sngi thohdieng u la pyniasoh ialade bad ka seng Congress bad ban pynkhreh syndon ban aireng iaka elekshon MLA 2023 kum u kyrtong ka Congress na North Shillong Constituency.
Ia u Bah JA Lyngdoh ryngkat bad ki nongkyrshan ki jong u la pdiang sngewbha da u Working President ka Meghalaya Pradesh Congress Committee (MPCC) Bah PN.Syiem uba long ruh u MDC ka Pynthorumkhrah Constituency ha ka jingdonlang ki nongialam ka MPCC bad ka North Shillong Block Congress Committee (NSBCC).
U Bah PN Syiem ula ong, kum u MDC ka thaiñ yn ai ka jingkyrshan kaba pura bad yn trei shitom ban pynthikna ba u Bah JA Lyngdoh ryngkat bad ka seng Congress kin jop don burom iaka elekshon MLA na North Shillong.
U la ong, bun ki briew kila sdang ban wan pyniasoh ialade bad ka seng Congress bad ka daw hi ka long ba kila thait bad kdang iaka sorkar synroplang Meghalaya Democratic Alliance (MDA) namar ba kala dap sa tang da ki kam bamsap bad mynta ki don jingshaniah tang ha ka seng Congress.
U Bah JA Lyngdoh u la kular ban trei shitom ban pynkhlain iaka seng Congress hapoh ka jingialam u President ka MPCC u Bah Vincent Pala bad kiwei kiwei bad yn ialeh ban trei shitom ban kyntiew iaka seng Congress ym tang naka bynta ka North Shillong hynrei haka jylla hi baroh kawei.
Kum ban shu pynkynmaw u Bah JA Lyngdoh haka elekshon MLA 2018 ula iakhun na ka seng BJP hynrei ula shah pynliem noh ha u Bah Adelbert Nongrum.
Ha u Nailur mynta u snem u Bah JA Lyngdoh ula mih noh naka seng BJP hadien ba kala mih ka kynrum kynram ha kane ka seng ha kaba iadei bad ka jingai tiket ban pynieng kyrtong na North Shillong.
