Shillong, Jylliew 29: U MLA barim ka South Tura, John Lesslee K Sangma hynne ka sngi balang, ula leit ban pyniasoh noh ialade sha ka BJP ban pynkhreh ialade ban iakhun ia ka elekshon MLA 2023 na kane ka party.
Ia u John Lesslee la pdiang da u President ka BJP Bah Ernest Mawrie ha ka jingiadonlang u Myntri sorkar bah Sanbor Shullai bad u MLA Bah A.L.Hek.
Haba iakren bad ki nongthoh khubor, u John Lesslee ula ong ba ula kylli ia ki paid ka Ri-lum Garo bad ruh ki nongialam bad ki nongkyrshan jong u ia kawei ka jingkylli ba don mo kiba lah ban kyntait ia ka jingshisha baka BJP kan dang iai neh ha ka bor synshar ha Delhi sa 20 snem.
“Baroh ki ong em bad kim lah ban kyntait, namar kata balei ba ngi ki nong Meghalaya ngin don shabar na ki kam pynroi. Balei ban ngin phai lyndet na ka Political Party kaba synshar ha Delhi bad pynduh ialade ia ki kam pynroi. Ta ka daw, ka daw ba nga rung BJP ka dei ka jingdonkam jong nga bad ka jingphohsniew ia ka roi ka par jong ki paidbah ka Ri-lum Garo bad jong ka Jylla Meghalaya”.
U la ong ba ki samla kila lynga mynta ban ioh ia ka kam, ka surok ka long kaba sniew kat shaba palat, ka jingdonkam shuh shuh ia ki jaka sumar bad kiwei kiwei.
“Kaei kaba jia ha Assam kala pynshlur shisha ia nga ban jam shakhmat bad ban iadonlang ha kane ka party khnang ban lah wanrah ia ki kam pynroi kat kaba lah da ka jingkyrshan bad jingiatreilang jong ki nongialam ka Party” ula ong.
U John Lesslee ula pynpaw ia ka jingkwah ban iakhun ia ka elekshon MLA na South Tura, kaba mihkhmat mynta da u Myntri Rangbah ka Jylla Conrad Kongkal Sangma.
“Hynrei ngan ieh ha ka jingstad jong ka party, la ki kwah ia nga ban iakhun lane em, ngan ieh ia kane ha ki ban shim rai” ula ong.
