Shillong, Nailar 14 : Ka Kynhun Myntri ka Sorkar Jylla ha ka sngi Palei kala rai ban wanrah lang noh ia ka VAT halor ka kyiad hapoh ka tnad Excise bad mynjur ia ka Bill ban pyntreikam ia ka amendment ka GST ba dang shen.
U Myntri Rangbah Conrad K Sangma ula ong ba kane ka jingpyniasoh ka dei kaba la shim hadien ki jingialang bishar kam ban pynbeit ryntih ia ka jinglum khajna na ka kyiad.
“Ia ka VAT la khmih da ka Tnad Taxation bad ia ka Excise la khmih da ka Tnad Excise na ka bynta ka kyiad. Kumta ia ka rai la shim ba baroh kine artylli kin long noh kawei bad kan hap noh hapoh ka jingkhmih ka tnad Excise” ong u Conrad.
U ong ba kane ka jingpynkylla kan pynjanai ia ka jingkhmih bad ka jingpynmih pisa.
“Kane kan pynthikna ia ka jingkhmih ba kham bha, ka jingtreikam kaba kham bha bad kan don jingkylla ruh ha ka jingkiew ka jingioh lum khajna na ka bynta ka tnad Excise” ula bynrap.
Halor ka GST, u CM ula ong ba ka kynhun Myntri kala mynjur ia ka Bill ba hap ban leh, ban pyniaid ryngkat bad ka ain ka Jylla da ki jingpynkylla bala leh hapoh ka ri.
“Kila don ki jingpynkylla bala leh ha ka Goods & Service Tax hapoh ka kyrdan ka Council….kiba donkam ia baroh ki Jylla ban shim bad mynjur ia ki hala ki jong ki Act” ong u Conrad
