Shillong, Nailar 19 : Laingut ki MLA ka Congress kynthup ia 2 ngut kiba shah sospon ha ka Meghalaya Pradesh Congress Committee, kila leit pyniasoh ialade sha ka seng National People’s Party (NPP) hynne ka janmiet sngi Nyngkong.
Kine ki 3 ngut ki dei u MLA ka Mawhati Bah Charles Marngar, MLA ka Nongstoin Bah Gabriel Wahlang bad u MLA ka Umsning Dr Celestine Lyngdoh.
Ia kine ki lai ngut la pdiang sngewbha da u National President ka NPP bad Myntri Rangbah ka Jylla Conrad K Sangma ha ka jingiadonlang ki Nongialam ka Party, ha ka jingialang kaba long ha Ophis treikam ka NPP ha Shillong.
Ka Congress kaba don 4 ngut ki MLA hadien ka jingiehnoh kam u MLA ka Gambegre Saleng Sangma uba la jop ia ka elekshon MP-Lok Sabha na Tura, kala don mynta satang uwei u MLA hapoh ka Iingdorbar Thaw Ain ka Jylla.
Une u MLA ba sah marwei ha ka congress u dei u Bah Ronnie V Lyngdoh uba mihkhmat ia ka Mylliem constituency.
Kine ki laingut ki MLA kila leit aiti ruh ia ka shithi sha u Lamphang ka Ingdorbar Thaw Ain ka Jylla Thomas A Sangma, kaba pynpaw ia ka jingleit iasnoh lang noh bad ka NPP.
Na ka liang u Lamphang ka Iingdorbar, ula ai ka jingithuh ia ka jingwan pyniasoh kine ki 3 ngut ki MLA ka Congress bad ka NPP.
Da kane ka jingwan iasoh kine ki laingut ki MLA, ka NPP kala kynjoh ia u nombor 31 ha ka jingdon MLA hapoh ka Iingdorbar Thaw Ain ka Jylla.
Kumba long mynta, ka Liang Pyrshah hapoh ka Iingdorbar Thaw Ain ka Jylla ka kynthup satang 10 ngut ki MLA ba kynthup ia ka Trinamool Congress (TMC) kaba don 5 ngut ki MLA, ka Voice of the People Party (VPP) kaba don 4 ngut ki MLA bad ka Congress kala sah satang uwei u MLA.
Ia ka khubor ba bniah yn sa pyllait kham shibit.
 hynne ka janmiet sngi Nyngkong.){kind=link}