Shillong, K’Lyngkot 09: Ka Bharatiya Janata Party (BJP) Meghalaya hynne ka sngi kala pdiang sngewbha ia ki 3 ngut ki rangbah ki ban wan iasoh ialade shaka Party.
Ki 3 ngut ki rangbah kiba pyniasoh ialade ki kynthup u Dr. Wansainbor A Lyngwi na Sohra, u Bah Meialam Kharmalki na Upper Shillong bad u Bah Elnathan Rynthathiang na Umlyngka.
Ia kine 3 ngut la pdiang da u nongialam ka Meghalaya BJP bad Myntri Sorkar Bah A.L Hek, u nongaiktien ka Party Bah M.Kharkhrang bad kiwei ki nongkitkam ka Party.
Haba kren ha kane ka sngi u Bah A.L Hek ula ong ba kane ka jingwan iasoh ki rangbah kan nang pynkhlain shuh shuh iaka Party khamtam ka ba ban pynkhreh iaka MP ilekshon 2024 bad MLA ilekshon 2028 ha Meghalaya.
U Bah Hek ula ong ba kino kino kiba iasoh sha ka BJP kidei ban buh iaka mat jong ka bha ka miat ka Ri ha khmat eh bad kidei ban trei shitom ban kyntiew iaka Party bad iaka imlang sahlang.
