Shillong, Nailar 04: Ka Sorkar Meghalaya Democratic Alliance (MDA) hynne ka sngi palei, kala ai dak ba kan nym don satia kano kano ka jingtohkit ba laitluid halor ka jingkem ia u Vice President ka BJP Bernard N Marak dang shen, uba la shah kynnoh pyniaid ia ka kam khaii met hapoh ka farm jong u shimet.
Kane kala paw hadien ba ki Nongialam ka BJP kila pynlong ia ka jingiakhih ba jai jai dang shen ban dawa ia ka jingtohkit ba laitluid halor kane ka jingjia hapoh ka farm jong une u Nongialam ka party uba dei ruh u MDC ka GHADC.
Haba twad jingmut, u Myntri Rangbah ka Jylla Conrad Kongkal Sangma ula iathuh ha ki nongthoh khubor ba ka jingtohkit kala iaid shaid shaid halor kane ka jingjia.
“Namar ka jingtohkit kala iaid shakhmat ia kane ka jingjia bad ba ki jingshisha kila mih pyrthei, ngam tharai ba dang donkam ban thung ia ka kynhun tohkit ba laitluid” ula ong
Ha ka 22 tarik Naitung, ki Pulit ka West Garo Hills kila kyndang ia ka kam khaii met hapoh ka farm jong une u MDC ka BJP, kaba lam sha ka jingiohkem ia 73 ngut ki briew bad ioh pyllait ia 5 ngut ki Khynnah kiba shah set slung.
Hadien kane, ka medical report kala ong ba iwei na kine ki san ngut ki Khynnah I dei iba la shah leh beijot.
Kumba long mynta, u Bernard Marak u dang don hapoh ka jingtohkit jong ki Pulit hadien bala wan ialam ia u sha Tura na Uttar Pradesh.
Halor ka jingdawa ban thung ia ka jingtohkit halor ka jingpyntreikam ia ka smart meter ha Jylla, u Conrad ula ong ba ka Sorkar Jylla kala dep ban thung ia ka Inquiry Commission, kaba la dep ban aiti ia ka kaiphod halor ki jingkynnoh bamsap baroh hapoh ka MeECL.
“Ka kaiphod jong ka jingtohkit kala ong ba kam don satia kano kano ka kam bamsap. Nga mut ba lada ki briew ki dang kwah sa kawei ka jingtohkit, phi tip hi ba katno por kane kan shim watla ka kaiphod jingtohkit kala dep mih mynta” ula ong.
“Lada ki don ia kano kano ka jingsngewkhia, kila dei ban wan ban iakren bad ka Sorkar. Ki lah ban iakren bad u DyCM, ngim don jingeh eiei ia kata hynrei nga shu pynkynmaw ba ka kaiphod jingtohkit kala dep mih bad kala kren shai ba kam shym don satia kano kano ka jingtrei bym hok” ula bynrap.
