Tura, Naiwieng 18 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Tura ka dei ka jaka kaba ar ha Jylla ban don ka jingpynher ia ka Lama ba heh jong ka Ri, haba bynrap ba kum kine ki Lama yn sa pynher ruh ha Jowai bad ha baroh ki District Headquarter.
U Conrad ula pynpaw ia kane hadien ka jingpynher ia ka lama heh jong ka Ri kaba la pynieng hapoh ka P.A Sangma Complex. Ula pynher ia kane ka lama ha ryngkat ki sur jingtem ka National Anthem.
Ula pynpaw ia ka jingsngew sarong bad jingieid Ri haba pynher ia kane ka lama lai rong ha ka P.A Sangma Integrated Sports Complex, kaba don ha Dakopgre.
“Ka Lama ka ri ka dei ka dak jong ka jinglong kyrpang jong ngi bad ka pyni ia ka jingiatylli jong ngi, ka histori, ka jinglong trai ri, ka jinglaitluid bad ki jinglong ba kordor jong ngi. Ka jingpynher ia kane ka lama heh ka pyni ia ka jingburom jong nga ia kane ka Ri ba khraw jong ngi, ka India” ula ong.
U Conrad ula pyntip ba shibun ki kam bad ki prokram kin sa wan mynta na ka bynta ban pynitynnad ia ka sor Tura.
“Ka bynta kaba ar jong ka Tura Beautification Project kan sa sdang noh shen. Ha kane ka bynta, ngi la ai ia ka song ba T. 16 klur ban pynitynnad ia ka thain Tura Bazaar, ka ban kynthup ia ki street light, ka jingmaramot ia ki lynti iaid bad ka jingpynkylla dur ia ka Tura Super Market” ula ong.
Ula pyntip ruh ba ka bynta kaba lai kan long eh halor ka jingpynitynnad ia ka surok na Lad Araimile haduh ba kut jong ka surok P.A Sangma.
U Conrad ula pyntip ruh ba ka Paint My City Campaign (jingairong ia ka Sor) kan nang iai bteng, ka ban kynthup ia ki jingtei, ki kynroh bad kiwei kiwei, bad ula pan ruh ia ka jingiatreilang ki paidbah ba kan long kaba jop.
U Myntri Rangbah ula kren ruh halor ki project jingtei kiba la dep bad ba dang iaid ha ka thain Dakopgre haba pyntip ba ka jingpyntrei ia ka Additional Secretariat Building kala iaid shaid shaid bha.
“Markhap ka Building ka Ophis MPSC, kaba dang shu plie ha ka taiew bala lah, ka jingpyntrei ia ka jingtei kala iaid sted bha na ka bynta ka Convention Centre, ka ban shakri kum ka jaka ban pynlong ia ki jingialang bad ki prokram bapher bapher” ula ong.
Ula pynbna ruh ba ki project jingtei kiba heh kin sa mih ha ka jaka jong ka Orchid Hotel kaba rim ha Dakopgre. “Ka Hotel 5-star ha Tura, ka ban trei da ka Hilton Group, kan dei kawei na ki jingtei ba kongsan bad la khmih lynti ba yn pyndep ia ka hapoh ka 24 bnai” ula ong.
Halor ka jingpynkhreh ia ka National Games 2027, u Myntri Rangbah ula ong “Ka jingtrei kala nang iaid na ka bynta ban pynheh ia ka Pa Togan Nengminja Stadium, kynthup ki gallery ban tei thymmai bad kiwei kiwei ki jingdonkam. Ka jingpyntrei ia ka Multi-Disciplinary Indoor Stadium markhap ka PA Sangma Stadium bad ka Sunny Hill Indoor Stadium ruh kila nang iaid”.
Ha kane ka jingialang la wan iashimbynta ruh da u Deputy Commissoner ka West Garo Hills Vibhor Aggarwal, Superintendent of Police ka WGH Abraham T Sangma bad kiwei kiwei ki Heh Ophisar.
