Nongpoh, Jymmang 24: Ka Hynniewtrep Youth Council, Ribhoi Sepngi , hynnin ka sngi Palei, ki la ïoh bat noh ïa 16 ngut ki bar jylla ki bym biang ki kot ki sla kiba wan sah bad trei bylla beaiñ hapoh ka thain ka Ribhoi sepngi.
Ïa kitei ki 16 ngut ki bar jylla lah ioh ban bat da ki HYC Ri-Bhoi Sepngi hapoh ka jingialam u President samla RC Thangkhiew. lah ioh bat ia ki na ki artylli ki shnong kata naka thaiñ Umsnong bad Mawskei kaba hap hapoh jirang block.
U samla RC Thangkhiew u la ïathuh ba kane ka jingkhynra ka dei shibynta jong ka Sier Lapalang operation ba la pyntreikam dang shen da ka Sengkmie.
Une u samla u ïathuh ruh ba ka seng hadien ka jingioh jingtip ia kane ka jingdon ki bar jylla mar mar ki la leit ban jurip ha ka jaka trei jong ki bad haka jingbishar bniah iaki kot ki sla la lap ba kitei ki bar jylla kim shym la don wat tang kawei ka kot ka sla kaba biang bad kaba la pynlong iaka seng ban phah leit phai noh sha ki jaka kaba ki sah.
U la pynpaw ruh ba ka seng lyngba kane ka Sier Lapalang operation kan nang iai bteng ban peit pyrman iaka jingwan trei ki bar jylla ki bym shym don ki kot ki sla bad ha kajuh kapor u la kyntu ruh ia ki nongshong shnong bad kin phikir bha hala ki shnong jong ki bad ha kajuh kapor u phah ruh ka khubor sha baroh ki bar jylla ki bym don iaka kot ka sla kaba biang ba kin mih noh mardor naki jaka sah bad jaka trei bad lada kin dang lap ia ka jingdon kum kine ki bar jylla ka seng kan nym map bad kan leh beit iaka kam ba ka dei ban leh.
