Shillong Nohprah 03: U Symbud Myntri Rangbah ka Jylla Bah Prestone ryngkat ka MDC ka Nongshken Kong Grace Mary Kharpuri, ha ka sngi Balang, kila pynhap pyrda ia ka jingrakhe Jubili Ksiar jong ka Lympungdama Sports Social Welfare and Cultural Club kaba don ha ka shnong Nohwet.
Haba kren ha ka jingialang, u Bah Prestone ula iaroh ia ki nongialam kiba la trei shitom ba ka Club ban kynjoh sha ka rta kaba 50 Snem ha ka ban saindur bad ban ai jingshakri ia ki paitbah ha ki bynta bapher bapher bad ula kyrpad ia ki paidbah ba kin iatreilang bad ka Club khnang ba kan shim ia ki sienjam ban ai jinghikai ia ki khynnah bad ki samla ba kin kiew shaphrang ha ka jingim ka jongki.
U Symbud Myntri Rangbah ula ong, ba tang shu dep shna ia ka surok Shillong Dawki, kan jur shuh shuh ka jingwan tuid ki nongjngohkai sha kane ka jaka ban ia ka Sohra, kumta ki paidbah kidei ban long kiba la pynkhreh bad ruh ban long kiba don burom bad ba kim dei ban pynthud ia ki nongjngohkai kiba wankai sha kane ka shnong kaba don ia ki jaka jngohkai.
U Bah Prestone ula kyntu ruh ia ki nongshong ban shim ia ka skhim ban shna ia ki homestay kaba ioh haduh 30% kum ka ram bad 70% kaba ai da ka sorkar khnang ba kan kylla long kum ka lad ban kamai jakpoh kaba shirta.
Ula kular ban shimkhia ia ka jingkyrpad ban shna ia ka madan ialehkai kaban long kum ka Mini Stadium ha ka shnong khnang ba yn ioh pyndonkam da ka shnong baroh kawei bad ula pyntip ba ha u snem ban wan yn sa sdang noh ia ka kam ban shna ia ka ophis treikam jong ka Club bad ruh ban pynbiang ia ki tiar shet tiar tiew ba ki paidbah ha ka shnong kin ioh ban pyndonkam.
Ha kane ka jingialang la wan iashimbynta lang ki riew rangbah kiba kynthup ia u Bah Rahbok Tynsong, ki Nongialam Shnong, ki nongialam bad ki dkhot jong ka Club bad ki paidbah ka shnong Nohwet.
Nalor kane la sam ia ki khusnam sha ki khynnah kiba la jop ha ki jingiakob ki bapher bapher bad la pynkup burom ruh ia ki nongialam kiba mynta bad kiba la khlad noh kiba la trei shitom ha kaban seng 50 snem mynshwa ia ka Lympungdama Sports Social Welfare and Cultural Club.
