Khliehriat, Lber 01: Ka ophis jong u District Transport Officer, Khliehriat, East Jaintia Hills District hynne ka sngiThohdieng, kala pynhap pyrda noh ia ka jingrakhe ia ka National Road Safety Week kaba 35, da kaba pynlong ia ka prokram ha ka phyllaw jong ka ophis u DTO.
Ha kane ka prokram la wan ban iashimbynta da u District Transport Officer ka East Jaintia Hills u Bah P. Laloo, u Motor Vehicle Inspector (MVI) Bah H. Dkhar, Sub-Inspector (SI) of Police u R. Das, u Enforcement Inspector, I. Dkhar, ki trai jong ki kali kamai, ki nongialam jong ki kynhun Drivers Association, ki nonghikai, khynnah pule bad kiwei kiwei.
Haba kren ha ka jingialang u Motor Vehicles Inspector, H. Dkhar ula pynsngew ha ki nongniah bad ki khynnah pule halor ka jingkongsan jong ka jingshngain haba iaid ha ki surok bad ki lynti ki syngkien bad ula kyntu ia ki ba kin pynsaphriang ia ka khubor bad ban pynsngewthuh lem ia kiwei halor kane ka mat, ha ki iing ki sem jongki bad ha ka imlang sahlang baroh kawei.
Nalor kane, ula pynshai ruh ha kaba iadei bad ka mat “Be a Road Safety Hero” jong ka jingrakhe ia ka National Road Safety Week, ba ki paidbah kidei ban mih shakhmat ha kaban ai jingiarap ia kiba mad ia ki jingjia aksiden bad ban pyntip sha ki pulit bad ban phone ruh ha u number 108.
Katba u R. Das ula kren bniah halor ka jingshngain ia ki nongleit nongwan bad ula kyntu ia ki ba kidei ban iatreilang ryngkat bad ki bor kiba dei khmih bad ban bud ryntih iaki kyndon jong ka rukom niah ia ki kali khnang ban lait na kino kino ki jingjia aksiden.
