Shillong Lber 27: Ka 2nd NTPC National Ranking Archery Tournament 2023 kaba la pynlong ha Archery Ground, SAI Training Centre, NEHU, Shillong kala poi noh sha kaba kut hynne ka Lah Sngi u Blei.
Ia katei ka jingiakob la pynlong da ka Archery Association of Meghalaya, kaba don hapoh jong ka kynhun Archery Association of India.
Baroh ki nongialehkai kiba la wan ban iashimbynta haka jingiakob ki don 351 ngut kaba kynthup ia ki 78 ngut ha ka kyrdan Sub Junior, 115 ngut ha ka Junior bad 198 ha ka kyrdan Senior.
Ha katei ka sngi kut, la pynlong ia ka jingiakob ha ka kyrdan Compound bad Recurve na ka bynta ki Senoir Men bad Women.
Ka Kong Matsiewdor War Nongbri, President jongka Archery Association of Meghalaya ryngkat bad u Secretary u Bah P.B War Nongbri bad u Prof PS Shukla Vice-Chancellor ka NEHU kila ia donlang ha katei ka sngi pynhap pyrda ia katei ka lympung iakob siat khnam.
