Mynjur ka Mazdoor Union ban phah noh ia ki tanker sha Meghalaya
Nongpoh, Nohprah 14 : Ka Sorkar Jylla kala pyneh beit triang halor ka sienjam bala shim da ka Tnad Pulit ban kem ia ki briew kiba donkti ban khaii tuh ia ka umphniang petrol/diesel na ki kali tanker ha National Hghway-6, Ri-Bhoi bad pyntip ba ka jingtohkit kala iaid shaid shaid ban sei madan ia ki jingshisha baroh.
Kane ka sur kala mih ym tang na u Myntri Rangbah ka Jylla Conrad K Sangma, hynrei kala mih ruh na ki Heh Ophisar ka Tnad Food & Civil Supply & Consumers Affairs ha ka jinglaang bad ka North East Petroleum Mazdoor Union (NEPMU) lem bad ki kompani umphniang bapher bapher kaba long hynne ka sngi Palei ha Nongpoh.
Ia kane ka jingialang la khot pynlong halor ka jingiakhih ka NEPMU kaba la sangeh ban pynpoi umphniang petrol/diesel sha Meghalaya naduh ka 12 tarik Nohprah, halor ka jingdawa ba ka Sorkar ka dei ban pyllait noh ia baroh ki dkhot ka Union kiba shah kem ha ki Pulit halor ka jingkynnoh ba ki khaii tuh ia ka umphniang kaba dei ban pynpoi sha ki Petrol pump hapoh ka Jylla.
Ha kane ka jingialang kaba la pynlong ha ka sien kaba ar bad ka NEPMU, la lamkhmat ia ka Jylla da u Additional Deputy Commissioner ka East Khasi Hills Bah Peter Passah, u Additional Deputy Commissioner ka Ri-Bhoi Bah MB Tongper katba ia ka NEPMU la lamkhmat da u Presient Ramen Das. U President ka Petroleun Association of Meghalaya Bah Kennedy Khyriem ruh ula iadonlang ha kane ka jingialang.
Lah ban kdew hangne ba ki Pulit ka Tnad Crime Branch ka Jylla, kila kem ia katto katne ngut ki Nongniah kali tanker haka 24 tarik Naiwieng ha ka jingkhynra ia ki tanker kiba khaii tuh ia ka umphniang ha surok NH-6. Kane ka jingkhynra ka dei ruh kaba la pynlong halor ka jingujor jong ki petrol pump ka Jylla kiba pyntip ia ka jingjah ka umphniang.
Ka jingialang ba hynne ka sngi, kala iatai sani halor ka jingdawa ka NEPMU bad ka jingiaid ka jingtohkit jong ki Pulit ia ka kam tuh umphniang ba dang shu kyndang shen da ki Pulit.
Haba kren sha ki Nongthoh Khubor, u Bah Peter Passah u la pyntip, ba ha kane ka jingialang la ioh ban iatai sani bha halor ka jingdawa jong ka Mazdoor Union ban pynlait jamin noh ia ki dkhot jong ki na ka along jong ki pulit ka Meghalaya.
“Ngi la pynshai ba kane kam hap satia ha ka jingpeit jong ngi (Sorkar) bad ngi la kyrpad ba kin ailad ia ka Iingkashari ba kan leh ia kaba donkam khnang ba ngin lap shisha ia kiei kiba donkam bad ba ngin lah ban ratdyngkhong shisyndon ia kine ki jingsniew ne ki kam be-ain kiba la jia la bun bun snem” ula ong.
U Bah Passah ula ong ba namar ka jingiaid ka kam khaii tuh ia ka umphniang ha NH-6, ka ain hi kan trei la ka jong ka kam bad ka Sorkar kam tuklar satia ia kane.
Une u Ophisar u pyntip ba hadien ka jingiaphylliew jingmut kaba janai bha, ka NEPMU kala rai ban weng biang shipor ia ka rai ban pynsangeh shalan umphniang sha Meghalaya.
U Ramen Das ula pynpaw ba ka Mazdoor Union kala hun ia kaei kaba mih na kane ka jingialang bad hadien arkynta, kan sap hah noh ia ki kali kit umphniang/tanker ba kin pynpoi ia ka umphniang sha Meghalaya.
